Iironga 12 - Etestemente Epe ✠ 1951

ONTOPORUA 12. Omuapostoli Jakobus ta kuatua ta si. Petrus ta mangururua komujengeli.

¹ Merara ndika omukuaniirua Herodes okua kuatica jamue jom’Eklesia, he te j’epeke.

² Okua dipagica Jakobus omumuahina gua Johannes negongamuere.

³ Ndere sho a mona nokutja aajuda oje tshi panda, okua kuatica Petrus uo. Nokuri orja ri erara rjiikurja iitoue.

⁴ Sho e mu kuata he e mu edirire mondrongo, te mu rangerica keengundu daarangeri oojane noojane, di ninge omarangero gane. Opaska sho ha piti, okua ara ku mu fara kotshipara tshotshiguana.

⁵ Otsho Petrus a rangerua mondrongo. Ndere Eklesia orje mu garikanena ku Karunga nuudiginini.

⁶ Uusiku mbuija ua randurua kesiku ndjoka, Herodes a hara oku mu fara kotshipara tshotshiguana, Petrus okua koca pokati kaakuiita jaari, h’a mangua nomarjenge gaari. Aarangeri jaari ja rangera potsheero tshondrongo.

⁷ Ndere nduno omujengeli gua Muene okua cikama po, mokajugo mua ri uujerere, ta tsu Petrus te mu pendura a ti: “Cikama, enderera nduno.” Omarjenge oga gu mo momake ge.

⁸ Omujengeli te mu rombuere: “Zara, neengaku di zara uo.” Otsho a ninga. Nguijaka okue mu rombuere itsheue: “Zara eruakani rjohe, ngueje randurandje.”

⁹ Ta zi mo nde te mu randura. He ina tshiua shono a ningirua komujengeli, nokutja otsho tsh’otshiri nenge aaue. Okua ri a ruka okua mona emoniko.

¹⁰ Ojo ja pitirire erangero rjotango na ndjoka etijari, taa ja kotsheero tshotsheera tshokuha motshirando. Shoka otsh’ihegurura tshotshene. Taa piti j’enda mokandjira. Naanzija omujengeli okua topoka na he.

¹¹ Nena Petrus okua pukuruka ta ti: “Nena ondi tshi tshi nauerera nokutja Muene okua tuminandje omujengeli gue, a kuacandje meke rja Herodes no mu mbjoka otshiguana tshaajuda tsha tegerera”.

¹² Manka e tshi diradira, okue ja kondjugo ha Maria, hina ha Johannes, ngu h’icanua Markus. Mu mua ri ojendji ja gongara, taa garikana.

¹³ Sho a konkora potsheero tshomukara, omurerua guedina Rode okue ja po, a puakene.

¹⁴ Sho a dimburura eui rja Petrus, in’egurura otsheero moru’enjanju rje enene, aaue, okua matukire mo, a hokorora nokutja Petrus a cikama potsheero.

¹⁵ Jo taa ti ku he: “Ngueje ua jaduuka.” Ndere sho a diginine nokutja otsho tshi ri, oja jamukura ja ti: “Shira omujengeli gue.”

¹⁶ Ndere Petrus ta diginine okukonkora. Nena oj’egurura, je mu mona taa kuatua keruriro.

¹⁷ H’okue ja anda ja muene. Te j’okororere ngashi Muene e mu kuca mondrongo nde ta ti: “Otsho rombuereni Jakobus naamuameme.” Nde ta zi mo, ta hi keshara rirue.

¹⁸ Ndere sho kua tshi, omua ri epijagano enene mokati kaakuiita morua shoka Petrus a ningirua.

¹⁹ Herodes ngu e mu arere, ine mu mona, okua pura aarangeri, ta popi ja geerue. He muene okua zi ku Judea, ta hi ku Kesarea. Oko a ka menekera.

²⁰ Okua geje unene moru’aatiro naasidoni. Mboka je ja puamue ku he, ja mona uukuume ua Blastus, erenga ekuruntu rjomukuaniirua, j’indire ombiri, oshoka iiparuca jiirongo jauo oja zire ku he.

²¹ Esiku rimue Herodes okua zara eenguuo duukuaniirua ue, ta kaatumba kotshipangerapundi, he te j’uvicire.

²² Aantu oj’igida ja ti: “Eui ndjoka orja Karunga tshiri, kari shi rjomuntu.”

²³ Opo nduno omujengeli gua Muene e mu denge, sho ina simaneka Karunga. Omazinjo oge mu tuku, nde ta si.

²⁴ Ndere ohapu ha Karunga oha koko, ha taandere.

²⁵ Barnabas na Saulus oja garuka, taa zi ku Jerusalem, sho kua ja ronga eguanico rjauo. Taa kuca uo Johannes, edina rje rjoponto Markus.