Iironga 10 - Etestemente Epe ✠ 1951

ONTOPORUA 10. Kornelius

¹ Motshirando Kesarea omua ri omurumentu, edina rje Kornelius, erenga rjongundu haakuiita ndji ha rukua “Italika.”

² H’okua ri omurumentu omujuki, a tira Karunga, he muene nondjugo he ahishe, a kuaca orundji aacigona, he a garikana Karunga nuudiginini.

³ Ohe nguno a mona memoniko, mostunde ontimugoji omutenja, omujengeli gua Karunga, ngu e ja ku he a ti: “Kornelius.”

⁴ Okua rigamene ku he, ta kuatua ketiro ta ti: “Muene otshitshee?” Ndere omujengeli okua ti ku he: “Omagarikano gohe niikuaca johe oja farua kotshipara tsha Karunga ng’omagano.

⁵ Nena tuma aarumentu ku Joppe, ja ka ete Simon edina rje rjoponto Petrus.

⁶ Ohe omuhenda gua Simon nguijaka omuperi guiipa. Ondjugo he ohi ri pomukunkuro guefuta. Ohe te ku rombuere shoka u nokuninga.”

⁷ Omujengeli ngu a popi na he, nena ina monikua ue. He oku’icana jaari jomaapija je nomukuiita gumue, ngu a tira Muene, gumue gua mbaka ja ri mepangero rje.

⁸ Mboka okue j’okororera atshishe, he te ja tumu ku Joppe.

⁹ Esiku rja nofu, mboka sho ja ri mondjira, oj’ishirire otshirando, nde Petrus okua rondo kombanda hondjugo okugarikana postunde ontikanekamue.

¹⁰ Nena okua s’ondjara, a hara okurja. Ndere, sho je mu terekere, okua s’onkunkumucika.

¹¹ A tar’eguru rj’eguruka, mo mua zi otshinima shi tsha f’elapi enene etokere, rja kuatua keenkotse darjo ine, rja zi keguru, rj’uka pevi.

¹² Murjo omua ri iinamuenjo ajishe jevi, ji nomaguru gane, na mbjoka haji ipuedea, needira dokeguru.

¹³ Eui rja ti ku he: “Petrus, cikama, tsera, ngueje u rje.”

¹⁴ Ndere Petrus a jamukura: “Muene tshivarerue, sigo onena ngaje inandi rja tsha, shi tsh’indikua, shi tsha njata.”

¹⁵ Neui orje mu popica rutijari rja ti: “Shoka tsha jerekua ku Karunga, ngueje ino tshi ruka tsha njata.”

¹⁶ Shoka otsha ningua rutatu. Okuza mpoka otshinima tsha tja ngaaka otsha tshunicua meguru.

¹⁷ Manka Petrus a rimbirirua nanena kenongero rjemoniko ndika, a mona aarumentu mbo ja tumua ku Kornelius, oja pura ondjugo ha Simon, jo ja cikama potsheero.

¹⁸ Oj’igida, jo ja pura Simon gu’edina rjoponto Petrus nge omo e ri.

¹⁹ Petrus, sho a diradira nanena emoniko ndika, Ombepo ohe mu rombuera: “Tara aarumentu jatatu otaa ku kongo.

²⁰ Ano nduno, cikama, rondoroka, u he puamue na jo, ino rimbirirua, oshoka ongaje nde ja tuma.”

²¹ Nena Petrus okua rondoroka, ta hi kaarumentu mboka ta ti: “Tara ongaje ngu, ngu tamu kongo. Ne ano omua ira tshee?”

²² Oja ti: “Erenga Kornelius, omurumentu omujuki, nakutira Karunga, ngu t’okororua ngaano kotshiguana atshishe tshaajuda, ohe ngu a rombuerua komujengeli omujapuki, e ku icanene kondjugo he, nokuuva eehapu dohe.”

²³ H’okue ja farere mondjugo, nde te ja jakura. Ongura ta cikama, nde ta hi puamue na jo. Aamuahina jamue jomu Joppe oje mu cindikira.

²⁴ Esiku rja nofu okua ciki ku Kesarea. Kornelius e ja tegerera. A shijire aakuazimo nookuumekerera.

²⁵ Nopua ningi, Petrus sho e ja mo, Kornelius okue mu tsakaneke, ta tseengoro peempadi de, he te mu amberere.

²⁶ Petrus okue mu jambukica a ti: “Cikama, nangaje uo omuntu.”

²⁷ Ndere manka taa kundacana, he okue ja mo, taa hada ojendji, j’igongarera mo.

²⁸ Te ja rombuere: “Omu tshi tshi naanaa nokutja omuntu omujuda oku’indikua okukara nokutarera po omuntu, ngu ke shi omujuda. Ndere Karunga oku’urukirandje nokutja inatshi pitikua ue okutara omuntu a fa ngu e noku ikererua nga ngu a njata.

²⁹ Otsho ngaje nde ja, sho nd’icanua, inandi tengatenga. Ano otii mu pura ngashingi: Omu’icanenandje tshee.”

³⁰ Kornelius ta jamukura: “Ngashingika omasiku gane ga pita, sh’onda ri andi garikana mondjugo handje postunde ontimugoji. Ndere omurumentu ta cikama po, a zara onguuo ontokere to.

³¹ Ta ti: ‘Kornelius, egarikano rjohe orj’uvika, niikuaca johe oja dimburukiua motshipara tsha Karunga.

³² Tuma ano ku Joppe, u icane Simon, ngu e nedina rjoponto Petrus, omuhenda mondjugo ha Simon, omuperi guiipa, ndji hi ri popepi nefuta.’

³³ Ongashi ngaje inandi arura okutuma kungueje. Ndere ngueje muene oua ninga nauerera, sho ue ja po. Nena nduno ss’atushe otu ri po mpa tu puakene ku doka ua rombuerua ku Muene.”

³⁴ Ongashi Petrus a hekama okana ke a ti: “Nena nduno onde tshi dimburura motshiri nokutja Karunga ka tara omuntu kombanda.

³⁵ Aaue, oha panda motshiguana keshe ngoka e mu tira, he ha rongo iironga juujuki.

³⁶ Karunga okua tumina aana j’Israel eehapu de, h’a hokororica Jesus Kristus ombiri, ohe ngu Muene guajeshejeshe.

³⁷ Omu tshi tshi shoka tsha ningua motshirongo atshishe tsha Judea. Otsha shimbika mu Galilea, okuza ketshatsho ndi Johannes e mu uvicire.

³⁸ Ndi tshi Jesus omunatsaret, Karunga okue mu gueeka n’Ombepo Ondjapuki no neenkondo odindji, ngu a hendagura ta rongo iironga iihanaua, a heruda ajeshe, mba ja ri j’epekua komusatana, oshoka Karunga okua ri na he.

³⁹ Osse eentari da mbika ajishe a ronga motshirongo tshaajuda no mu Jerusalem. Oje mu dipaga noku mu endjerereka komuti.

⁴⁰ Ndere Karunga okue mu jumuda esiku etitatu, he e mu orokice.

⁴¹ Ha miipaci jaantu ajeshe, aaue, omiipaci jeentari doka d’ucua nare ku Karunga, sse jene, sho tua rire na sho tua nuine puamue na he, ejumuko rje sho rja piti.

⁴² He e tu rombuera, tu uvicire, sse tu okororere aantu nokutja ohe tuu ngoka a turua po ku Karunga ng’omupanguri guaanamuenjo no guaasi.

⁴³ Aaprofeti ajeshe oje mu okorora nokutja keshe tuu ngoka e mu iteera, ota peua edimepo rjeendjo medina rje.”

⁴⁴ Manka Petrus a popi eehapu doka, ajeshe mba j’uvu ehuvico ndika, ja kurukirua k’Ombepo Ondjapuki.

⁴⁵ Ndere aahiteeri mbejaka, ja fukarekua nare, mboka je ja na Petrus, oja rurirua, oshoka aapagani uo oja tirirua omagano g’Ombepo Ondjapuki.

⁴⁶ Oshoka oj’uvu taa popi omaraka, jo taa hamberere Karunga.

⁴⁷ Nena Petrus a ti: “Ore ta vuru okutindira omeja getshatsho mboka ja tuumba Ombepo Ondjapuki nga sse uo.”

⁴⁸ Opo e ja tshatshica medina rja Jesus Kristus. Ongashi je mu indire a kare pu jo omasiku gamue.