Iironga 1 - Etestemente Epe ✠ 1951

ONTOPORUA 1. Jesus ta hi keguru. Ehogororo rjomuapostoli Matias

¹ Mukuetu Teofilps, ond’okorora mehokororo rjandje njotango mbijaka ajishe, Jesus a shimbike okuninga nokuronga.

² Sigo okesiku ndjoka a tuumbua meguru, he a gandjica Ombepo Ondjapuki iipango je kaapostoli aahogororua.

³ Okuza komeepeko ge e ja urukira nomadidiriko ogendji nokutja oku nomuenjo. Omasiku eemrongo ine okue j’ihororera he te j’uvicire otshirongo tsha Karunga.

⁴ Ngija a rire na jo okue ja rombuere, kaa ze mo mu Jerusalem, aaue, oja tegerere omarombuerero ga Tate a ti: “Omue g’uva mokana kuandje.

⁵ Oshoka Johannes okua tshatsha nomeja. Ndere ne otamu ka tshatshua n’Ombepo Ondjapuki omasiku omatshona nge ga piti.”

⁶ Ongashi mba j’igongarere pu he, je mu pura: “Muene oto ka dika otshirongo tsha Israel merara ndika?”

⁷ Okue ja jamukura a ti: “Katshi shi otshinima tsheni okutshiua omacimbo neestunde doka Tate a huca meenkondo de.

⁸ Ndere otamu ka peua eenkondo d’Ombepo Ondjapuki, tamu ka namberua ku he, ne tamu ka ninga eentari dandje mu Jerusalem no mu Judea atshishe no mu Samaria, sigo okeesha duujuni.”

⁹ Okuza peehapu dika okua jerucua pombanda miipaci jauo, nd’otshikogo atshi mu siikire, inaje mu mona ue.

¹⁰ Manka ja rigamena, sho ta hi keguru, aarumentu jaari oja cikama po, ja zara eenguuo eentokere.

¹¹ Oja ti: “Jarumentu ne aagalilea otshee mua cikama mua tara keguru? Jesus, ngu e mu kucua a ha keguru, otsho ngaano ta ka garuka ngashi mue mu mona a hi meguru.”

¹² Okuza mpoka oja tshuna ku Jerusalem, ja zi kondundu hahi tiua “ondundu h’eemono,” hi ri popepi na Jerusalem, pu notshikako tshi cike pondjira hesabati.

¹³ Sho ja ciki ko, oja hi motshoto tshokombanda, muka haa kara: Petrus na Johannes, Jakobus na Andreas, Filippus na Tomas, Bartolomeus na Mateus, Jakobus ha Alfeus, Simon Tselotes na Judas ngu mumuahina gua Jakobus.

¹⁴ Ajeshe oja ri nediradiro rimue puamue naakiintu, Maria hina ha Jesus naamuahina, ja garikana.

¹⁵ Momasiku ngejaka Petrus okua cikama mokati kaakuauo, — opua ri otshigongi tshaantu je cike pecere rimue neemrongo mbari, — nokua ti:

¹⁶ “Jarumentu ne jamuameme, opu nokuguanicua etshangua ndi rja shunganekua k’Ombepo Ondjapuki mokana ka David, ta popi Judas, ngu a ri omutetekeri gua mbejaka ja kuata Jesus.

¹⁷ Okua ri a jarurirua kusse, he a perue otshitoporua tshejakuro rjetu.”

¹⁸ T’irikorere epja nondjambi huurunde, nde sho a hipondo, okua topa pokati, ndere omandjandja ge ageshe aga zi mo.

¹⁹ Ajeshe jo mu Jerusalem oje tshi tshiua. Omoru’otshinima shi epja ndika rja rukua meraka rjauo “Hakeldama” nokutja epja rjombinzi.

²⁰ Membo rjomapsalmi omua tshangua kua tiua: ‘Egumbo rje nari cigue po, kamu kare nande ogumue. Gurue na peue ejakuro rje rjuuepiskopi.’

²¹ “Ano gumue guaarumentu, mba ja ri nasse ecimbo arishe, manka Muene Jesus he e ja mo no ha piti mokati ketu,

²² okuza ketshatsho rja Johannes sigo okesiku ndika a kucua po a hi meguru, na ninge puamue nasse ontari homuhokorori guejumuko rje.”

²³ Taa joorora mo jaari: Josef ha tiua Barsabas, e nedina rje rjoponto Justus, na Matias.

²⁴ Taa garikana taa ti: “Ngueje Muene, ou tshi eemtima dajeshe, uruka nokutja oguni gua mboka jaari ua ogorora,

²⁵ a peue eshara mejakuro ndika rjuuapostoli, ndi rja eciua ku Judas, a he keshara rje muene.”

²⁶ Okuza mpoka oj’umbu iihogororico. Nde otshogororico tsha tsu Matias. Ohe a jarurirua maapostoli omurongo na gumue.