Filemon 1 - Etestemente Epe ✠ 1951

¹ Paulus ngu a kuaterua Jesus Kristus, na Timoteus omumuameme, ku Filemon omuhorike omurongi omukuetu.

² No ku Appia omumuameme omukiintu omuhorike no ku Arkippus omukuiita omukuetu, no kegongaro rjomondjugo hohe.

³ Oshenda nombiri ha Karunga Tate hetu no ha Muene guetu Jesus Kristus nahi kare na ne.

⁴ Onda pandura arushe Karunga, nge nde ku dimburukua momagarikano gandje.

⁵ Ond’uvu ohore nehiteero rjohe rjokuiteera Muene Jesus no hokuora aajapuki ajeshe.

⁶ Ehiteero rjohe ndi u na puamue na sse ri oroke nokudimburura iironga iihanaua ajishe, mbi ja rongua pu he mu Kristus Jesus.

⁷ Onda mona enjanju nehekerero enene mohore hohe, oshoka eemuenjo daajapuki oda tararekua kungueje mumuameme.

⁸ Mu Kristus Jesus ngaje ondi neenkondo doku ku rombuera shoka tshi nokurongua.

⁹ Ndere moru’ohore ngaje onda ara ndi ku indire oshoka ngueje ua fa Paulus ngu a kurupa, he ohe a kuaterua Jesus Kristus.

¹⁰ Otandi ku indirire omumuandje Onesimus. Ongaje nde mu pa omuenjo ngija nda ri meemango.

¹¹ Nare ino mona oruporo mu he. Ndere ngashingika okua ningi omukuaci guohe he guandje.

¹² Onde mu tshunica kungueje. Ndere ngueje mu tuumba ong’omuenjo guandje muene.

¹³ Onda ara unene a kare pungaje, he a rongerendje peshara rjohe meemango dandje di andi umbatere evangelium.

¹⁴ Ndere manka ngueje muene ino iteera, ngaje inandi ara oku tshi ninga. Uuhanaua uohe kau ze meciminiko, aaue, omeharo rjohe muene.

¹⁵ Oshoka ngiika okua topoka okarara okatshona nangueje, opo u mu peue itsheue arushe.

¹⁶ Ha ng’omupika, aaue, opeshara rjomupika ng’omumuanjoko omuhorike. Otsho ngaje ndi mu ore. Ndere e horike tshiri unene kungueje sho a guanekua nangueje konjama no mu Muene.

¹⁷ Ngaje nge omukueni, mu tuumba ngashi to tuumbandje muene.

¹⁸ Nge okue ku ninga neji nenge e ku niue eenkuma, di jarurirandje.

¹⁹ Ongaje Paulus, — nda tshanga neke rjandje muene, — onda ara oku di futa. Inandi ara ndi ku rombuere kutja ngueje muene omunankuma kungaje.

²⁰ Eno mumuameme, onda ara u kuacendje mu Muene. Njanjuda omutima guandje mu Muene.

²¹ Ngaje onde ku tshangera mehinekero kevuriko rjohe. Ondi tshi tshi nokutja iironga johe oji vure mbi nda ara.

²² Ou rongerandje uo eshara rjokukara. Ondi netegerero ndi mu peue itsheue moru’omagarikano geni.

²³ Epafras omukuatua omukuetu mu Kristus Jesus ote ku kundu.

²⁴ Markus, Aristarkus, Demas na Lukas, aarongi aakuaci jandje.

²⁵ Oshenda ha Muene guetu Jesus Kristus nahi kare nombepo heni Amen.