Ehororo 9 - Etestemente Epe ✠ 1951

ONTOPORUA 9. Itshee aajengeli mbeja.

¹ Omujengeli omutitano ta shiki embendo. Ngaje andi mono onjoci, tahi zi keguru, ho otahi guire pevi, nde tahi peua oshapi hombogo ha ha muure.

² Ho tahi egurura ombogo, nde tara ko, oruici taru zi mo mombogo, ruo rua f’oruici meziko enene, nd’etango nomuku tagu ruudikua koruici, ndu taru zi mombogo.

³ Mo moruici ruombogo tamu zi eembashu, tadi ja pevi, do tadi peua eenkondo nga dija deendje kombanda hevi.

⁴ Nde tadi rombuerua, kadi jone po omuidi guevi no keshe otshimeno otshitarara nomuti, aantu ike, mba kaa nedidiriko rja Karunga kiipara jauo.

⁵ Do oda rombuerua uo, kadi ja dipage, aaue, okujeepek’ike eemuedi ntano, nde okuepeka kuado kua fa ku’ondje, nge tahi ri omuntu.

⁶ Nde pomasiku ngejaka aantu taa ka konga okusa, ndere itaa ke ku mona, taa ka jeerukua okusa, ndere okusa taku ke ja h’ondapo.

⁷ Orupe rueembashu taru f’uukambe ua mangua ngu’ouo kiita, uo uo oparekua keemutse dauo niishani jiingoldi, nd’iipara jado ja fa jaantu.

⁸ Omafufu gado oga f’omafufu geemutse daakiintu, go omeego gado ga f’omeego geenkoshi.

⁹ Do oda zarekua iikandekico ja f’iipakorua jiihera, nd’epupo rjomuauaua gado rja f’emborongondo rjomatemba, ge nuukambe ouindji, tau matuka u he morugodi.

¹⁰ Do odi neemutshira da fa deendje, nd’eengona di ri keemutshira dado, di neenkondo dokuepeka aantu eemuedi ntano.

¹¹ Do odi ri mepangero rjomukuaniirua omujengeli guombogo, edina rje motshihebereji Abadon, motshigreki Apolion.

¹² Ojeeje hotango oha pita, nde tara ko, natango mbaari tadi randura ko.

¹³ Omujengeli omutikanekamue ta shiki embendo. Ngaje andi uvu eui, tari zi keembinga iine dohaltari hiingoldi, ndji hi ri miipaci ja Karunga.

¹⁴ Rjo otari ti komujengeli omutikanekamue, ngu a kuata embendo: Mangurura mo aajengeli jane, mba ja mangua komuronga Eufrat.

¹⁵ Aajengeli jane taa mangururua mo, mba ji irongikidira otundi nesiku nomuedi nomuvo gokudipaga otshititatu tshaantu.

¹⁶ Omujaru guongundu haakuiita juukambe ogua ri 10000 ruti 20000. Ngaje ondu uva omujaru guauo.

¹⁷ Nde mehororo ndika ondi uete uukambe, na mba ju ukumana ko, ja zara iikandekico iitirigane ja f’omuriro, niitsimine niimbundu, neemutse duukambe ong’eemutse deenkoshi, nde momakano gauo tamu zi omuriro noruici nofundanga.

¹⁸ Otshititatu tshaantu otsha dipagua kiiponga mbi iitatu: komuriro, koruici no kofundanga, taji zi momakana gauo.

¹⁹ Oshoka eenkondo duukambe odi ri momakana gauo no meemutshira dauo, oshoka eemutshira dauo oda f’omajoka do di neemutse, uo tau pongica na do.

²⁰ Ndere aantu, mba ju upa ko, nokutja mb’inaa dipagua kiiponga mbija, inaji idirurura je ece iironga jomake gauo, kaa simaneke ue iiruru niimenka, mbi ja tungua niingoldi niisilveri niijeera nomamanja niiti, mbi kaji tshi okutara nenge okuuva nenge okuenda.

²¹ Jo inaa futa nande omadipagacano nuunganga nuufuci uauo.