Ehororo 8 - Etestemente Epe ✠ 1951

ONTOPORUA 8. Aajengeli 7 nomambendo.

¹ Ndere Onzigona sho ha patukununa otshipatico otshitinuari, eguru tari muena tshi cike potundi himue.

² Nde tandi mono aajengeli 7, mba ja cikama pu Karunga, taa peua omambendo 7.

³ Omujengeli a hiri okue ja, te engene kohaltari, a kuata otshitsinino tshotshingoldi. H’ote eterua iizimba ojindji joruici, a ture omagarikano gaajapuki ajeshe mohaltari hotshingoldi, ndji hi ri potshipangerapundi tsha Karunga.

⁴ Nd’oruici ruiizimba jomagarikano gaajapuki ajeshe taru zi kotshikasha tshomujengeli, ruo taru rondo pombanda ku Karunga.

⁵ Omujengeli ta kuata otshitsinino, te tshu uda omuriro guohaltari, te gu umbire pevi; tapu oroka eemukaratata nomaui neembadi nomakekamo gevi omanene.

⁶ Nd’aajengeli mbeja 7, mba je nomambendo 7, taji irongikida okugashika.

⁷ Omujengeli guotango ta shiki embendo, nde tara ko, eempague nomuriro, gua vongakana nombinzi, tagu oroka, guo tagu umbirua mevi, nd’otshititatu tshevi tatshi tshungana po, otshititatu tsheemuti tatshi fikua po nomuidi agushe omutarara tagu pi po.

⁸ Omujengeli omutijari ta shiki embendo; po opuo oroka otshinima tsha f’ondundu onde, ha jeta komuriro, tatshu umbirua mefuta, nd’otshititatu tshefuta tatshi tshituka ombinzi.

⁹ Notshititatu tshiikuameja jo mefuta notshititatu tsheesikepa tatshi ningine mo.

¹⁰ Omujengeli omutitatu ta shiki embendo, nde meguru tamu gu onjoci onene, ha minikira ha f’onjeka, ho tahi guire motshititatu tsheemuronga no tsheecicija domeja.

¹¹ Edina rjonjoci ndjika orja rukua Tshiruru. Otshititatu tshomeja otsha ninga omaruru, nd’aantu ojendji otaa si komeja, nga ga ninga omaruru.

¹² Omujengeli omutine ta shiki embendo, nd’otshititatu tshetango no tshomuedi no tsheenjoci tatshi tsuua, otshititatu tshado opo tatshi ruuda, notshititatu tshomutenja itatshi jere ue nuusiku tuu.

¹³ Nde tandi mono, ngaje andi uvu eui rjontsa, tahi tuku pokati keguru, ho tahi igida neui enene, tahi ti: Ojeeje, jeeje jeeje kaantu, mba taa rumbu muujuni, moru epopiro ri iri rjaajengeli mbeja jatatu, mba je nokushika naanena omambendo.