Ehororo 6 - Etestemente Epe ✠ 1951

ONTOPORUA 6. Embo, ndi ri niipatekico 7.

¹ Ngaje onda mono Onzigona, tahi patukununa tshimue tsho miipatico 7, ngaje andi uvu uo tshimue tsho miinamuenjo iine, tatshi igida neui rja f’omundundumo, sho tatshi ti: Ira u tare!

² Nde tara ko, andi mono okakambe okatokere, ngu a hukumana ko, oku nuutati, he a zarekua otshishani, nde ta hi ong’omusindani a ka sinde.

³ Sho tahi patukununa otshipatico otshitijari, tandi uvu otshinamuenjo otshitijari, tatshi ti: Ira u tare!

⁴ Nd’okakambe ki iri taka piti po ka tirigana ka f’omuriro. Nde ngu a ronda ko, tu unzire muujuni, a kuce mo ombiri, ja dipagacane: he ta peua egongamuere enene.

⁵ Sho tahi patukununa otshipatico otshititatu, tandi uvu otshinamuenjo otshititatu, tatshi ti: Ira u tare! Nde tara ko, okakambe okaruude ke ja po, nde ngu e ka ronda, ta kuata meke rje otsheerekico.

⁶ Nde tandi uvu eui, tari zi mokati kiinamuenjo iine, rjo otari ti: Okapunda kiirja otaka hi mondenari himue, uupunda uutatu uomaangu itshee omondenari himue, ndere omaholi nomavinju ino ge epica.

⁷ Sho tahi patukununa otshipatico otshitiine, otandi uvu eui rjotshinamuenjo otshitiine, tatshi ti: Ira u tare!

⁸ Nde tara ko, okakambe okambundu taka piti po; ngu a hukumana ko, ota tiua Eso, nd’aasi jotshirongo tsharjo taa randura ko, rjo tari peua epangero rjokupangera eembinga adishe duujuni okudipaga negongamuere nondjara nuuvu uudigu niirikama jo pevi.

⁹ Sho tahi patukununa otshipatico otshititano, otandi mono koshi hohaltari eemuenjo da mbeja, mba ja dipagerua ohapu ha Karunga nehokororo, ndi ja diginina.

¹⁰ Do otadi igida nomaui omanene, tadi ti: Sigo unake, Muene omujapuki, ng’omunatshiri, to kara ito pangura, ngueje ito geere aantu jo muujuni ombinzi hetu?

¹¹ Jo ajeshejeshe otaa peua onguuo ontokere, taa rombuerua ja tegerere okarara okatshona, sigo omujaru guaapija aakuauo no guaamuahina ogua guanicua, mba taa ka dipagua ngashi mbeja ja dipagerue.

¹² Ngaje onda mono uo, sho ha patukununa otshipatico otshitikanekamue, ekekamo edigu rjevi tari uvika, etango tari ruuda rja f’oshako hiipa, nd’omuedi agushe gua f’ombinzi.

¹³ Neenjoci tadi zi keguru, do tadi guire pevi, ngashi omukuju hagu guica omangongua gago, nge tagu shikua kiikunguru.

¹⁴ Eguru rjo otari tshuna monima ong’ombapira tahi gonjua, neendundu neemutunda mokati kefuta tadi zi po pomashara gado.

¹⁵ Aakuaniirua juujuni nomarenga nookapitija naajamba naakengeri naapija ajeshe, mba je ri momagumbo ga mbeja, tajo orama momakuena no mokati komamanja geendundu.

¹⁶ Jo otaa rombuere eendundu nomamanja: Tu guireni, ne mu tu siikire, mu tu oreke kotshipara tsha nguija, ngu a kaatumba kotshipangerapundi, no kondjashi hOnzigona.

¹⁷ Oshoka esiku enene rjondjashi hauo orje ja. Ore ta vuru okukara po?