Ehororo 3 - Etestemente Epe ✠ 1951

ONTOPORUA 3. Ombirive he ku Sardes.

¹ Tshangera omujengeli guegongaro rjo mu Sardes, to ti: Ngu e neembepo 7 da Karunga neenjoci 7, otsho ta ti: Iironga johe ondi ji tshi. Ou nedina rjomunamuenjo, ndere ua sa.

² Penduka po, koreka mbeja, mba ja fa taa hara okusa. Oshoka ondi uete iironga johe, inajo opara ja pua momesho ga Karunga kandje.

³ Dimburukua nduno, ongiini ua peua nongiini u uva: diginina shino, ngueje u idirurure. Ng’ino taatara, ngaje otii ja ku ngueje ong’omufuci, nde ku tshiua tuu erara, nde tii ke ja ku nguee.

⁴ Ou na matsa omadina ga jamue po mu Sardes, mb’inaa nigira keenguuo dauo? Jo naa hende na ngaje, ja zara eenguuo eentokere, oshoka oje do oparera.

⁵ Nakusindana ota ka zarekua neenguuo eentokere, ngaje itandi dimi po edina rje membo rjomuenjo, aaue, otii ke epurura edina rje pu Tate no paajengeli je.

⁶ Ngu e nomakutsi, nu uve ko, sh’Ombepo tahi rombuere omagongaro.

Ombirive he ku Filadelfia.

⁷ Tshangera omujengeli guegongaro rjo ku Filadelfia, to ti: Omujapuki h’Omunatshiri, ngu e noshapi ha David, ngu te egurura, nde kapuna ngu te edire po, ngu te edire po, nde kapuna ngu te egurura po, otsho ta ti:

⁸ Iironga johe ondi ji tshi. Tara, onde ku egururira otsheero, nde kapuna ngu ta vuru okutsheedira. Nande ou neenkondo eentshona, oua diginina ohapu handje, ngueje inu idimbika edina rjandje.

⁹ Tara, otandi ka tuma jamue po posinagoga ha satana, mba taji iti jojene aajuda, nde ka jo, taa popi ouara iirombo. Tara, ngaje otandi ke ja ninga je je ji isizimike keempadi dohe, jo ja dimburure, nokutja ondi ku ore.

¹⁰ Oshoka oua diginina ohapu honteni handje, na ngaje otsho ngaa ngii uo tandi ku kerere kerara rjemakero, ndi tari ja kombanda hevi okumakera ajeshe, mba taa rumbu muujuni.

¹¹ Tara, opo andi ja. Diginina shi u na, ku jugue otshishani nand’okomuntu.

¹² Nakusindana nda ara ndi mu ninge ongudi montempeli ha Karunga kandje, h’ita zi mo ue moka; ngaje andi ka tshanga mu ho edina rja Karunga kandje nedina rjomukunda gua Karunga kandje, nokutja ndi rja Jerusalem ompe, ndji tahi zi keguru, ku Karunga kandje, nedina rjandje muene epe tuu.

¹³ Ngu e nomakutsi, nu uve ko, sh’Ombepo tahi rombuere omagongaro.

Ombirive he ku Laodisea.

¹⁴ Tshangera omujengeli guegongaro rjo ku Laodisea, to ti: Amen, ngu omuokorori omudiginini h’omunatshiri, ngu etameko rjiitshitua ja Karunga, otsho ta ti:

¹⁵ Iironga johe ondi ji tshi, nokutja ku shi omutarara, nguee ku shi omupju. Ngeno kua ngueje omutarara nenge omupju, ando oshuepo.

¹⁶ Ndere sho u nokeenje, ku shi omutarara, nguee ku shi omupju, otii ku kungu mo mokana kuandje.

¹⁷ Oshoka oto ti: Ongaje omujamba, ondi irikorera uujamba, ngaje ine pumbua tsha ue, ndere nguee ku tshiua nani, nokutja ngueje omucigona, ngu a pumbua esiroshenda, ngueje ohepere, omuposi, u norutu ruouara.

¹⁸ Otii ku rombuere uunongo: Randa ku ngaje iingoldi, ja jerekua momuriro, u ninge omujamba, u zarekue neenguuo eentokere, nd’oshoni hohe horutu ruohe ruouara kah’oroke ue. Guajeka omesho gohe nomagadi, ngueje u mone ko.

¹⁹ Otii geere, ngaje andi denge mba ndi ore. Kembadara nduno u idirurure.

²⁰ Tara, ngaje andi cikama potsheero, ngaje tii konkora. Ngu tu uvu eui rjandje, he te egurura ndje, oku he andi ja, ndi rje uurarero na he, he na ngaje.

²¹ Nakusindana otii mu pe a kaatumbe na ngaje kotshipundi tshepangero, ngashi na ngaje uo nda sindana, nde Tate a kaatumbika ndje kotshipundi tshe.

²² Ngu e nomakutsi, nu uve ko, sh’Ombepo tahi rombuere omagongaro.