Ehororo 22 - Etestemente Epe ✠ 1951

ONTOPORUA 22. Eshuriro.

¹ H’otu urukire ndje omuronga guomeja gomuenjo, ga jera ngashi okristal, go ga za kotshipundi tsha Karunga no tshOnzigona.

² Mokati kondjira haguo no keemunkunkuro mbaari domuronga oku nomuti guomuenjo, ngu tagu imi rutimurongo na ruaari, keshe tuu omuedi otagu gandja iihimati jago, nd’omafo gomuti taga kuaca okupanga omarudi gaantu.

³ Mo itamu ka kara ue egeero, ndere otshipangerapundi tsha Karunga no tshOnzigona tatshi kara mo, jo aapija je otaa mu karere.

⁴ Taa ka tara otshipara tshe, jo je nedina rje miipara jauo.

⁵ Nuusiku kau ko ue, jo inaa pumbua ue uujerere uonjeka nenge uujerere uetango, oshoka Muene Karunga ote ja minikire, jo otaa ka pangera sigoosigo.

⁶ He ta rombuere ndje: Eehapu dika odu uka do dotshiri. Muene, Karunga keembepo daaprofeti, a tuma omujengeli gue a hurukire aapija je, shi tatshi ka ningua nzija.

⁷ Nde tara ko: opo andi ja. Omunerago ohe ngu ta diginine eehapu deshunganeko rjembo ndika.

⁸ Ngaje, Johannes, ongaje ngu nde tshu uva, nga’nde tshi mona shoka. Nde sho nde tshu uva nonde tshi mona, ondi isizimika keempadi domujengeli, ngu a hurukira ndje shoka, ndi mu amberere.

⁹ Nde ta ti ku ngaje: Ino tshe erekera ue, oshoka ongaje omupija guohe no guaamuanjoko, guaaprofeti, ngaje omupija nga nguee no guajeshe, mba ta diginine eehapu deshunganeko rjembo ndika.

¹⁰ He ta rombuere ndje: Ino patekica eehapu deshunganeko rjembo ndika, oshoka esiku orja cika.

¹¹ Ngu ta ningica otshiponga, na ningice otshiponga uo komesho; ngu a nigira, na kare a nigira uo nofu; ngu a huka, na ronge itshee shi tshu uka; ngu omujapuki, na rongekeke i ijapure.

¹² Tara, ngaje andi ja nzija, ho ondjambi handje ohi ri pu ngaje, ndi hi pe keshe tuu gumue hi cike piironga je.

¹³ Ongaje Alfa na Omega, nokutja omutango ngaje omushugunini uo, eshimbiko neshuriro.

¹⁴ Aanerago oombo ja kosha eenguuo dauo mombinzi hOnzigona, ja peue epangero rjokupangera omuti guomuenjo, ja pite miijeero, jo ja he momukunda.

¹⁵ Pondje opu na eembua neenganga naahonderi naadipagi na mba ja simaneka iimenka najeshe mba ja ri je hore, jo ja ninga iirombo.

¹⁶ Ngaje, Jesus, onda tuma omujengeli e mu okororere shoka momagongaro, ongaje omudi, ngaje orudi rua David, ngaje onjoci hongura ha jera unene.

¹⁷ He Ombepo nOmujarekua otaa ti: Ira! Nde ngu te tshu uvu, na tje: Ira! Na ngu a s’enota, ne je, ngu a hara, na peue ouara omeja gomuenjo.

¹⁸ Nde ngaje andi okororere ajeshe, mba taa huvu eehapu deshunganeko rjembo ndika: Nge pu na, ngu ta ka guedera ko himue ku do, Karunga ote ke mu denga nomeepeko ageshe, nga ga tshangua membo ndika.

¹⁹ Nge pu na gumue, ta ka kuca ko himue ho meehapu dembo rjeshunganeko ndika, Karunga ote ke mu kuca uo ontoporua he ho membo rjomuenjo no hajishe, mbi ja tshangua membo ndika.

²⁰ Ngu te tsho okorora, ta ti: Tshiri, opo andi ja. Amen. Ira, Muene Jesus!

²¹ Oshenda ha Muene Jesus Kristus nahi kare na ne amushe. Amen.