Ehororo 21 - Etestemente Epe ✠ 1951

ONTOPORUA 21. Otshirongo tsha Karunga mehadimo rjatsho.

¹ Ngaje onda mono eguru epe nevi epe, oshoka eguru rjotango orja shuru po, nevi rjotango otsho nefuta kari po ue.

² Ngaje, Johannes, onda mono omukunda omujapuki, Jerusalem omupe, tagu zi keguru, ku Karunga, guo oparekua ngashi omujarekua ti ihoparekere omujareki gue.

³ Nondu uvu eui enene, tari zi kotshipangerapundi, rjo tari ti: Tara egumbo rja Karunga ori ri paantu, he ta kara na jo, jo otaa ningi orudi rue, nde he Karunga ta kara na jo, Karunga kauo.

⁴ He Karunga ota ka ceta po omoodi pomesho gauo, rjo eso itari ka kara po ue nuupongo neriragano nuuhehame itau kara po ue, oshoka shi tshotango otsha ha.

⁵ Ngu a kaatumba kotshipangerapundi, ta ti: Tara, andi tshitukica ajishe iipe. He ta rombuere ndje, ta ti: Tshanga, oshoka eehapu dika odi notshiri nehuko.

⁶ He ta ti itshee: Tsha pua! Ongaje Alfa na Omega, nokutja eshimbiko neshuriro. Ngu a s’enota, ngaje otandi ke mu pa ouara omeja, taga zi mocicija homuenjo.

⁷ Nakusindana ote ke ga cigurura, ngaje otii ningi Karunga ke, he ta ningi omumuandje.

⁸ Nde ajeshe, mba ja ri nuumbanda na mba ja tinda okuiteera na mba ja nigira kuurunde na mba ja dipaga na mba ja jakeracana na mba ja anekera na mba ja simaneka iimenka najeshe, mba ja popja iirombo, otaa ka peua ontoporua hauo mombogo, mu tamu ririma omuriro nosulferi: oondika eso etijari.

⁹ Gumue po paajengeli 7, mba je nuujasha 7 u uda omeepeko 7 goshugunina, okue ja, ta popica ndje ta ti: Ira, onda ara ndi ku urukire omujarekua, h’omukiintu guOnzigona.

¹⁰ He ta fara ndje nduno mombepo ho komuenjo kondundu ondeendeka, tu urukire ndje omukunda omujapuki Jerusalem, sho tagu zi keguru ku Karunga.

¹¹ Go ogu nehadimo rja Karunga, gua minikira ong’okaue, ha ka fa emanja ejaspisa, ko ka fa uo kristal.

¹² Ogu nomudingiriri omunene g’omure, gu niijeero 12, nde kombanda hiijeero aajengeli 12, ji nomadina ga tshangua ko, go ga rukirua omarudi gaana ja Israel.

¹³ Kuuziro oku niijeero iitatu, kuumbandjaantu iijeero iitatu, kuumbugaantu iitatu nokuuninginino iitatu.

¹⁴ Go omudingiriri guomukunda ogu nomamanja 12 poshi, mo mua tshangua omadina 12 gaapostoli 12 jOnzigona.

¹⁵ Ngu ta popi na ngaje, oku notsheera tshotshingoldi, a hereke na tsho omukunda niijeero jaguo nomudingiriri.

¹⁶ Go omukunda ogua tungua gu niikororo 4, muure no muunene. He te ereke omukunda notsheerekico tshotshingoldi, te ereke eenkatu 12000, muure no muunene no pombanda ogu cike puamue.

¹⁷ Te ereke omudingiriri gu cike peenjara 144, ngashi omuntu te ereke, tsho otsho aajengeli uo.

¹⁸ Go omudingiriri ogua tungua nojaspis, nd’omukunda guojene niingoldirera, gua f’ekende rja jera.

¹⁹ Go omamanja goposhi gomudingiriri guomukunda ogo oparekua nuuue u iri na u iri. Emanja rjotango orja ri ojaspis, etijari osafir, etitatu okalsedon, etine osmarakt.

²⁰ Etitano osardoniks, etikanekamue osardis, etinuari okrisolid, etinutatu oberil, etimugoji otopas, etimurongo okrisopas, etimurongo na rimue ohiatsint netimurongo na gaari ohametist.

²¹ Jo iijeero 12 ojo omaue 12, keshe tuu otsheero eue rimue, do eendjira do momukunda iingoldirera, ja jera ngashi okristal.

²² Ontempeli inandi hi mona mo, oshoka Muene, Karunga omunankondo he muene ontempeli haguo nOzigona.

²³ Go omukunda inagu pumbua etango nomuedi, ja minikire mo, oshoka ehadimo rja Karunga otari gu minikire, rjo eminikiro rjaguo Onzigona.

²⁴ Aantu ja mo taa ke enda muujerere uarjo, jo aakuaniirua juujuni otaa gu etere ehamberero nesimano rjauo.

²⁵ Iijeero itage edirua nomutenja, oshoka uusiku kau mo ue.

²⁶ Go otagu eterua ehamberero nesimano komarudi.

²⁷ Shi tsha nigira, itatshi hi mo, tsh’otsho uo ajeshe, mba taa rongo uurunde na mba je niirombo; oombo ike tuu, mba ja tshangua membo rjomuenjo rjOnzigona.