Ehororo 20 - Etestemente Epe ✠ 1951

ONTOPORUA 20. Satana naasi taa pangurua.

¹ Ngaje onda mono omujengeli, ta zi keguru, e noshapi hombogo nerjenge enene meke rje.

² He ta kuata otshikoko, ejoka ndija ekuru, nokutja ondemoni nenge satana, te mu manga a kare meemango eemuvo 1000.

³ Te mu umbire mombogo, nde te mu edirire mo notshipatekico kombanda, ka pukice ue aantu, sigo eemuvo dija 1000 da piti. Nge da piti, na mangururue mo okarara okatshona.

⁴ Ngaje onda mono iipangerapundi, jo oja kaatumba ko, mba ja peua epanguro. Andi mono uo eemuenjo da mbeja, mba ja dipagerua ehokororo rja Jesus nohapu ha Karunga, na mb’inaa hinjongamena kotshirikama no kecano rjatsho, na mb’inaa tuumba edidiriko rjatsho miipara nenge momake gauo, jo ja ninga aanamuenjo, taa pangere pamue na Kristus eemuvo 1000.

⁵ Ndere aasi aakuauo inaa ninga aanamuenjo, manka eemuvo dija 1000 inadi pita po; oondika ejumuko rjotango.

⁶ Omunerago homujapuki ohe ngu e ri mejumuko rjotango; eso etijari kari neenkondo mu jo; jo otaa ka ninga aapristeri ja Karunga no ja Kristus, ja pangere na he eemuvo 1000.

⁷ Ndere eemuvo dija 1000 nge da piti, satana ota mangururua mo meemango de, ta zi mo a pukice aantu, mba je ri keembinga iine duujuni, Gog na Magog, te ja gongere ja he morugodi; omujaru guauo otagu erekua nehekevi pefuta,

⁸ Jo oja hi ano, taa rondo je ende muure u’uujuni, nde taa dingoroka etsari rjeengundu daakuiita aajapuki nomukunda omuorike.

⁹ Omuriro tagu gu meguru, gua za ku Karunga, go tagu fike po. Nde satana, ngu e ja pukica, tu umbirua mombogo hu uda omuriro nosulferi, mu tamu epekerua uo otshirikama,

¹⁰ Nomuprofeti guiirombo uusiku nomutenja sigoosigo.

¹¹ Ngaje onda mono otshipangerapundi otshinene, tsha toka, na ngu a kaatumba ko. Miipaci je evi neguru oja h’onda po, inaji ka monenua ue eshara.

¹² Ngaje onda mono aasi, aakuruntu naanjasha, ja cikama komesho gotshipangerapundi. Omambo oga suukurua, nembo rimue ri iri rja suukurua, rjo embo rjomuenjo, nd’aasi taa pangurua ku mbi ja tshangerua momambo, piironga jauo.

^13-14 Efuta tari gandja aasi mba ja mo, neso notshirongo tsheso taju umbirua mombogo homuriro: Oondika eso etijari.

¹⁵ Ndere ngu ina monikua a tshangua membo, otu umbirua uo mombogo homuriro.