Ehororo 2 - Etestemente Epe ✠ 1951

ONTOPORUA 2. Ombirive he ku Efesus.

¹ Tshangera omujengeli guegongaro rjo ku Efesus, to ti: Ngu ta kuata eenjoci 7 meke rje rjokurjo, ngu te ende pokati keenjeka diingoldi 7, otsho ta ti:

² Iironga johe ondi ji tshi, nediginino rjohe nehididimiko rjohe, nitshee sho ku nombiri naauineji; oue ereka mba taji iti aapostoli, nde ka jo, ngueje ue ja dimburura, nokutja oje niirombo.

³ Oua ri nehididimiko, ua mona uudigu moru edina rjandje, ngueje ino vurua nande.

⁴ Ndere onde ku dina, shoka ua ciga po ohore hohe hotango.

⁵ Dimburukua nduno, hu ua zire, igarura, ngueje u kembadare itshee iironga mbi jotango. Ng’ino ara, andi ja nzija ku nguee, ndi kandure po onjeka hohe, okutja ng’ino idirurura.

⁶ Eno, shino ou na, sho ua tonda iironga jaanikolaita, nga’ngaje uo nde ji tonda.

⁷ Ngu e nomakutsi, nu uve ko, sh’Ombepo tahi rombuere omagongaro: Nakusindana otandi mu pe okurja komuti guomuenjo, ngu gu ri moparadisa ha Karunga kandje.

Ombirive he ku Smirna.

⁸ Tshangera omujengeli guegongaro rjo mu Smirna, to ti: Omutango h’Omushugunini, ngu a ri a sa, ndere e nomuenjo, otsho ta ti:

⁹ Uudigu uohe ondi u tshi, nuucigona uohe, ndere ngueje omujamba. To tshekua ku mbeja, mba taji iti aajuda, nde ka jo, aaue, ojo osinagoga ha satana.

¹⁰ Ino tira nande omeepeko, nga tage ke ku ira; tara, satana ota ku umbira jamue po pu ne meemango e mu makere; ne tamu ka mona uupongo omasiku 10. Kara omudiginini sigo okusa, ngaje otii ku pe otshishani tshomuenjo.

¹¹ Ngu e nomakutsi, nu uve ko, sh’Ombepo tahi rombuere omagongaro: Ngu ta sindi, ita ka mona otshiponga tsheso etijari.

Ombirive he ku Pergamos.

¹² Tshangera omujengeli guegongaro rjo mu Pergamos, to ti: Ngu e nomuere, gu nomeego keembinga adishe mbaari, otsho ta ti:

¹³ Ondi tshi, mpa ua junga, mpo pu notshipundi tsha satana. Oto diginine ngaa edina rjandje, ngueje inu idimbika ehiteero rjandje. Pomasiku ngejaka Antipas okua ri omuokorori guandje omudiginini, ngu a dipagerue pu ne, mpa tapu jungu satana.

¹⁴ Ndere ondi na ohapu ontshona na nguee, nokutja ou naantu, mba je engena kerongo rja Balaam, ngu ta rongo Balek okupukica aana ja Israel, ja rje omagano giimenka, jo ja jakeracane.

¹⁵ Itshee ou na aantu, mba taa diginine erongo rjaanikolaita.

¹⁶ Na ngueje igarura; ng’ino ara, andi ja nzija ku nguee, ndi ka kondje na jo negongamuere rjokana kuandje.

¹⁷ Ngu e nomakutsi, nu uve ko, sh’Ombepo tahi rombuere omagongaro: Nakusindana otandi mu pe okurja omana, ndji ho orekua, ngaje tii mu pe emanja etokere, mo memanja ndi andi tshangere mo edina rje epe, ndi kari tshiuika nand’ okomuntu, oku ngu ike, ngu te ri peua.

Ombirive he ku Tiatira.

¹⁸ Tshangera omujengeli guegongaro rjo mu Tiatira, to ti: Omumua Karunga, ngu e nomesho ga f’omuriro gua tema, do eempadi de da f’otsheera tsha jeta, otsho ta ti:

¹⁹ Iironga johe ondi ji tshi, nehiteero rjohe nohore hohe nuukarere uohe nehididimiko rjohe, ndere uo okutja iironga johe joshugunina oji vure mbija jotango.

²⁰ Ondi na ohapu ontshona na nguee te ti: Oua pitikire omukiintu Jezabel, ngu ti iti muene omuprofeti, okuronga nokupukica aapija jandje, ja jakeracane, jo ja rje omagano guupagani.

²¹ Onde mu p’ompito hokuidirurura, ndere ina ara okueca ejakeracano.

²² Tara, otandi ke mu shata kokariri kaavu, nd’ajeshe, mba taa jakere na he, otii ja sis’iishuna iinene, ng’inaa hara okuidirurura, ja tonde iironga jauo.

²³ Nojana otii ja dipaga nepanguro rjokusa, opo omagongaro ageshe ga tshiue, nokutja ngaje onda konakona eemutima niitijanacigo. Ngaje andi ka futa keshe mokati keni tshi cike piironga je.

²⁴ Ndere ne otandi mu rombuere, mbeja mu Tiatira, mb’inamu diginina erongo ndika, ne mb’inamu dimburukua uure ua satana, te ti: Itandi mu p’omutenge gu iri, aaue,

²⁵ Ndere shi mu na, tshi diginineni sigo otandi ja.

²⁶ Nakusindana, ngu ta kembadara iironga jandje sigo eshuriro, otandi mu pe epangero maapagani.

²⁷ He te ke ja pangera nodimbo hotsheera, jo taa ka muashagurua ong’iijuma jeroua.

²⁸ Eenkondo da tja ngaaka onde di peua ku Tate. Ngaje otii mu p’onjoci hongura.

²⁹ Ngu e nomakutsi, nu uve ko, sh’Ombepo tahi rombuere omagongaro.