Ehororo 19 - Etestemente Epe ✠ 1951

ONTOPORUA 19. Ehamberero rjo meguru.

¹ Konima ha mbika ngaje ondu uvu omaui geengundu odindji da mba jo meguru, tagi igida: Alleluja! Ehupico nehadimo neenkondo oda Karunga ketu.

² Oshoka omapanguro ge oge notshiri nehuko, ngu a tokora omukiintu omuonderi a simana, ngu a pukica uujuni nomoondero, okua geera ombinzi haapija je, te hi pura keke rje.

³ Go otaga ti itshee: Alleluja! Nd’oruici ruauo taru rondo pombanda sigoosigo.

⁴ Aakuruntu 24 niinamuenjo 4 taji isizimike, jo taa hamberere Karunga, ngu a kaatumba kotshipangerapundi, taa ti: Amen, Alleluja!

⁵ Nd’eui tari zi kotshipangerapundi, tari ti: Amberereni Karunga ketu, ne aapija je na ne amushe, mbo mue mu tira, aatshona naakuruntu.

⁶ Ngaje ondu uvu eui rja fa rjaantu ojendji, ong’euajararo rjomeja ogendji no ng’epopiro rjeemundundumo eemunene, rjo tari ti: Alleluja, oshoka Muene okuo oroka ong’omupangeri, Karunga ketu, h’omunankondo.

⁷ Tu mu amberereni, tu mu rigorereni nepanduro, oshoka ohango hOnzigona oha cika, h’omujarekua gue okui ihopareka.

⁸ He ta peua ajishe jokuizareka, euiuiri etokere rja jera unene, oshoka euiuiri orjo iironga iiuanaua jaajapuki.

⁹ Nde ta rombuere ndje: Tshanga: Aanerago, oomba ji icanua kotshiriro tshohango hOnzigona, he ta ti itshee: Odo dika eehapu dotshiri da Karunga.

¹⁰ Ndere ngaje ondi ishata keempadi de, ndi mu amberere. Nde he ta ti ku ngaje: Ino tshe erekera ue, ongaje mukueni, ngaje mukuauo guaakueni mba je nehokororo rja Jesus, ngaje omupija nga ne. Injongameneni ku Karunga, oshoka ehokororo rja Jesus orjo ombepo heshunganeko.

¹¹ Ngaje onda mono eguru rje eguruka, nde tara, nokakambe okatokere uo, na gumue, ngu a hukumana ko, a rukua Omudiginini hOmunatshiri, he ta pangura, ta kondjo nehuko.

¹² Omesho ge oga f’omuriro gua jeta, nde komutse gue e niishani ojindji, h’oku nedina rja tshangua, ndere kakuna ngu e ri tshi, ohike e ri tshi.

¹³ A zara onguuo ontirigane, ha tshaua mombinzi, edina rje ondika: Ohapu ha Karunga.

¹⁴ Eengundu daakuiita jo meguru ode mu randura, da ronda uukambe uutokere, adishe di neenguuo deguereguegue.

¹⁵ Mokana kue tamu zi omuere gu upikua unene keembinga mbaari, a denge na guo omarudi gaantu. He te ja pangere nodimbo hotsheera, ta kueja otshikuejo tshomavinju gondjashi, go gegeero rja Karunga omunankondo.

¹⁶ Konguuo he no komugongo gue kua tshangua: Mukuaniirua guaakuaniirua, ho Muene guomuene.

¹⁷ Ngaje onda mono uo omujengeli, a cikama ketango, he ti igida neui enene, ta ti keedira adishe, di tadi tuka pokati keguru: Ireni, mu gongare kotshiriro otshinene tsha Karunga.

¹⁸ Mu rje onjama haakuaniirua nonjama homarenga gaakuiita nonjama haanankondo nojama huukambe no ha mba ju ukumana ko, nonjama haajamba no haapika no haanjasha no haakuruntu.

¹⁹ Ngaje onda mono otshirikama naakuaniirua juujuni neengundu daakuiita, ja gongara ja kondjice ngu a hukumana kokakambe naakuiita je.

²⁰ Nd’otshirikama tsha kuatua, nomuprofeti guiirombo puamue na tsho, ngu a ninga omadidiriko miipaci jatsho, nga ga pukica mba ja tuumba otshidimburukico tshotshirikama na mba ji injongamene kecano rjatsho. Jo ajeshe jaari oju umbirua je nomuenjo, merambo rjomuriro, ngu gua temua nosulferi.

²¹ Jo ojakuauo oja dipagua nomuere gua nguija, ngu a hukumana kokakambe, ngu gua za mokana kue, nd’eedira adishe di ikutica konjama hauo.