Ehororo 17 - Etestemente Epe ✠ 1951

ONTOPORUA 17. Omukunda Babilon tagu uvu egeero.

¹ Gumue po paajengeli mbeja 7, mba je nuujasha 7, okue ja, ta rombuere ndje, ta ti: Ira, onda ara ndi ku urukire etokoro rjomukiintu omuonderi a simana, ngu a kaatumba pomeja ogendji.

² Ngu aakuaniirua juujuni ojo onderere, nde aantu juujuni taa koricua komavinju gomoondero ge.

³ H’ota fara ndje mombepo ho komuenjo kombuga, oko nda ka mona omukiintu a kaatumba kotshirikama otshitirigana unene, tshu uda omadina gomatshekero, tsho tshi neemutse 7 neembinga 10.

⁴ Ho omukiintu okua zarekua nonguuo ontirigana hofuuri, hi niingoldi nuuue nuurenga, he ta kuata peke rje otshinuino tshotshingoldi, tshu uda uurunde nonigi horuondero rue.

⁵ Mo motshipara tshe omua tshangua edina: Otshoorekua! Babilon omunene, hina homoondero ho huurunde aushe uo pevi.

⁶ Ngaje onda mono omukiintu ngu a korua kombinzi haajapuki no kombinzi haahokorori ja Jesus. Onda ri nda kumua ko unene, sho nde mu mona.

⁷ Nd’omujengeli ta rombuere ndje: Otshike ua kumua ko? Onda ara ndi ku rombuere otshoorekua tshomukiintu no tshotshirikama, shi tatshi mu umbata, tsho tshi neemutse 7 neembinga 10.

⁸ Otshirikama shi ua mona; otsha ri ko, tsho katshi ko, tsho tatshi ka za muure uo moshi, nde tatshi hi mekaneneno; jo aantu jo muujuni (omadina gauo inaga tshangua membo rjomuenjo okuza ketshito rjuujuni) otaa kumua ko kotshirikama, nge taa tshi mono, shi tsha ri ko, nde katshi po ue.

⁹ Mpoka otapu monika eendunge, di di nuunongo: eemutse 7 od’eendundu 7, ku do omukiintu a kaatumba ko, odo uo aakuaniirua 7.

¹⁰ Jatano oja jonua po, gumue oko e ri, nd’omukuauo ine ja nanena, ndere nge te ja, ota ka ka kara okarara okashupi ike.

¹¹ Tsho otshirikama, shi tsha ri ko, nde katshi ko, tshojene omutinuutatu, ndere gumue guo mu uunuari mbeja ita hi mekaneneno.

¹² Nd’eembinga 10, di ua mona, odo aakuaniirua 10, mb’inaa peua nanena uukuaniirua, ndere taa ka peua epangero rjuukuaniirua otundi himuike tshimue notshirikama.

¹³ Jo otaa diradira tshimue, taa ka pa otshirikama eenkondo dauo nepangero rjauo.

¹⁴ Taa ka rua nOnzigona, nd’Onzigona tahi ke ja sinda, oshoka oho Muene gu’omuene, omukuaniirua guaakuaniirua, nd’ajeshe, mba je ri na ho, ojo aahogororua, aahicanua, jo aadiginini.

¹⁵ He ta ti ku ngaje: Omeja, nga ua mona, hu omuonderi a kaatumba, ogo omazimo nomarudi nomaraka.

¹⁶ Do eembinga, di ua mona kotshirikama, otadi ka tonda omukiintu omuonderi, tadi ke mu shura a kare ouara, taa ka rja onjama he, jo taa ke mu fika nomuriro.

¹⁷ Oshoka Karunga okua tura meemutima dauo okuronga shi tshe mu oparera, nokutja okugandja uukuaniirua uauo kotshirikama sigo eehapu da Karunga da guanicua.

¹⁸ Nd’omukiintu, ngu ua mona, omukunda omunene, ngu gu nepangero maakuaniirua juujuni.