Ehororo 16 - Etestemente Epe ✠ 1951

ONTOPORUA 16. Uujasha uondjashi tau tiruashi.

¹ Ngaje ondu uvu eui enene, tari zi montempeli, rjo otari rombuere aajengeli 7: Indeni, mu ka tireshi uujasha uondjashi ha Karunga mevi.

² Ngu guotango ta hi, ta tireshi okajasha ke mevi, nd’iitumba iidigu iiuineji unene taji kuata aantu, mba je nedidiriko rjotshirikama najeshe mba taa simaneke ecano rjatsho.

³ Omujengeli omutijari ota tireshi okajasha ke mefuta, mo tamu oroka ombinzi onga ndjika homusi, nde iinamuenjo ajishe taji si mefuta.

⁴ Omujengeli omutitatu ota tireshi okajasha ke meemuronga no meecicija domeja, do adishe otadi tshituka ombinzi.

⁵ Andi uvu omujengeli guomeja, ta ti: Muene, ou nehuko, ngu u ri ko, ngu ua za u ri ko, ongueje omujapuki, sho ua ronga epanguro rja tja ngaaka.

⁶ Oshoka ombinzi haajapuki no haaprofeti oje hi tirashi, nde ngueje ue ja po okunua ombinzi; eno, oje hi oparera.

⁷ Ngaje ondu uvu itshee omujengeli, ta ti pohaltari: Eno, Muene Karunga omunankondo, omapangero gohe oge notshiri nehuko.

⁸ Omujengeli omutine ota tireshi okajasha ke metango, ndi tari peua eenkondo dokuepica aantu nomuriro nuupju.

⁹ Nde aantu oja pushunuka kuupju uunene, nde taa tsheke edina rja Karunga, ngu ta pangere omeepeko ngaka, jo inaj’idirurura je mu pe esimano.

¹⁰ Omujengeli omutitano ota tireshi okajasha ke kotshipangerapundi tshotshirikama, nd’otshirongo tshatsho tatshi siikirua keemurema, jo aantu ja mo taji irumata omaraka gauo kuuhehame.

¹¹ Taa tsheke Karunga meguru moru uuhehame niitumba jauo, jo itaji idirurura kiironga jauo.

¹² Omujengeli omutikanekamue ota tireshi okajasha ke momuronga omuenene Eufrat, he ta puinica omeja gaguo, opo aakuaniirua jokuuziro ja rongikidirue ondjira.

¹³ Ngaje onda mono mokana kuotshikoko no kuotshirikama no mokana kuomuprofeti guiirombo tamu zi eembepo 3 da nigira, do da f’omafuma.

¹⁴ Odo tuu eembepo deendemoni, di tadi rongo omadidiriko, do tadi zi mo maakuaniirua juujuni aushe, di ja gongerere orugodi mesiku enene rja Karunga omunankondo.

¹⁵ Nde tara ko, andi ja ngashi omufuci. Omunerago ohe ngu ta rangere, he ta rongere eenguuo de, ke ende ouara, oshoni he kahi monike.

¹⁶ He te ke di gongera meshara, edina rjarjo motshihebereji Armagedon.

¹⁷ Omujengeli omutinuujari ota tireshi okajasha ke mombanda, nde eui enene tari zi montempeli kotshipangerapundi, rjo tari ti: Tsha ningua nduno!

¹⁸ Eembadi otado oroka nomaui neemundundumo nekekamo edigu rjevi tari ningua, ngashi inari uvika, hera aantu ja rumba muujuni, ekekamo tshiri edigu.

¹⁹ Nd’omukunda omunene tagu topoka eentoporua 3, niirongo jaantu taji ningine, nde taku dimburukua Babilon ndji onene kotshipara tsha Karunga, hi peue otshinuino tshomavinju gondjashi he rerarera.

²⁰ Do eemutunda adishe otadi ningine, neendundu inadi monikua ue.

²¹ Eempague eenene di cike pomamanja omanene tadi gu keguru maantu, jo aantu otaa tsheke Karunga moru iishuna jeempague, oshoka ojo iinene tshiri.