Ehororo 15 - Etestemente Epe ✠ 1951

ONTOPORUA 15. Aajengeli 7 jondjashi.

¹ Otsho nda mono edidiriko ri ri keguru, enene rjo ekumici: Aajengeli 7 oje nomeepeko 7 goshugunina, omu go ondjashi ha Karunga ha shurire.

² Onda mono tsha, shi tsha f’efuta ong’omakende, rja vundakana nomuriro, nde mba ja sinda otshirikama necano rjatsho nomujaru guomadina gatsho, taa cikama pefuta rja f’omakende, taa shiki uushumba.

³ Jo otaj’imbi ehimbiro rja Moses, omupija gua Karunga, nehimbiro rjOnzigona, taa ti: Iironga johe iinene jo iikumici, Muene Karunga omunankondo, neendjira dohe odi nehuko notshiri, Mukuaniirua guarusherushe.

⁴ Ore ando ine ku tira, Muene, h’ita simaneke edina rjohe? Onguej’ike omujapuki. Otshiri, omarudi ageshe otage ke ja, ge ku injongamene, oshoka omapanguro gohe ogo oroka.

⁵ Konima ha mbika, sho nda tara, onda mono ontempeli hetsari rjehokororo meguru, tahi ihegurura.

⁶ Nd’aajengeli 7 taa zi mo montempeli, mba je nomeepeko 7, jo ja zarekua nomarapi omatokere ga jera sheke, ga mangerua konturo neemunja diingoldi.

⁷ Tshimue tsho miinamuenjo iine otatshi gandja kaajengeli 7 uujasha 7 uiingoldi u uda ondjashi ha Karunga, ngu e nomuenjo arusherushe.

⁸ Ontempeli tahu uda oruici kehadimo rja Karunga no keenkondo de; kakuna ngu ta vuru okuja montempeli, manka omeepeko 7 gaajengeli 7 inaga guanicua.