Ehororo 14 - Etestemente Epe ✠ 1951

ONTOPORUA 14. Ehadimo rjOnzigona.

¹ Sho nda tara, onda mono Onzigona, ha cikama kondundu Sion, puamue na ho 144000, mba je nedina rjaho nedina rja She miipara jauo.

² Nde tii huvu eui, tari zi keguru, rja f’omupopiro guomeja ogendji, rjo rja fa uo omupopiro guomundundumo omudigu, nde eui, ndi ndu uva, rja ri ngashi eshiko rjaashiki juushumba, mba taa shiki uushumba uauo.

³ Jo otaj’imbi ehimbiro rja f’epe kotshipangerapundi no miipaci jiinamuenjo iine no jaakuruntu, nde kakuna ngu e tshi okuimba ehimbiro, oombej’ike tuu 144000, mba ja kurirua mo muujuni.

⁴ Ojo tuu mbeja, mb’inaj’injateka naakiintu, oshoka oje ri ngashi aakadona. Jo otaa randura Onzigona apeshe mpo tahi hi, oja kurirua mokati kaantu ong’aatango ja Karunga, jo jOnzigona.

⁵ Mokana kuauo inamu monikua nande iirombo, oshoka kaa nondjo potshipangerapundi tsha Karunga.

Aajengeli jatatu jepanguro.

⁶ Ngaje onda mono omujengeli a hiri, ta tuka pokati keguru, ngu e na evangelium rjarushe, a hetere omurombo guenjanju kaantu jo pevi no kiirongo no komazimo no komaraka no komarudi ageshe.

⁷ He ta popi neui enene, ta ti: Tireni Muene, ne mu mu simaneke, oshoka erara rjepanguro rje orje ja. Injongameneni nduno ku nguija, ngu a tshita eguru nefuta neecicija domeja.

⁸ Omujengeli a hiri te mu randura, ti igida: Babilon ogua jonua po, gua jonua po, omukunda ngu omunene, ngu gua koricire iirongo ajishe nomavinju gondjashi momoondero gaguo.

⁹ Nd’omujengeli omutitatu ta randura mbeja, he ta ti neui enene: Keshe ngu ti injongamene kotshirikama no kecano rjatsho, he ta tuumba edidiriko motshipara nenge meke rje,

¹⁰ Na nue komavinju gondjashi ha Karunga, nga ga tirua motshinuino tshondjashi he, inaga vundakanicua, he ta ke epekua nomuriro nosulferi miipaci jaajengeli aajapuki no jOnzigona.

¹¹ Nd’oruici ruomeepeko gauo taru ka ronda pombanda sigoosigo, jo kaa nevururuko omutenja nuusiku, okutja mba taj’injongamene kotshirikama nokecano rjatsho na mba taa tuumba edidiriko rjedina rjatsho.

¹² Omo mu na ehididimiko rjaajapuki, mba taa diginine iipango ja Karunga nehiteero mu Jesus.

¹³ Ngaje ondu uvu eui, tari zi keguru, rjo tari rombuere ndje: Tshanga: Aanerago oonakusa, mba taa sire mu Muene; Ombepo tahi ti: Okuza konena otaa ka vururukua kuudigu uauo, oshoka iironga jauo otaji ja randura.

Aajengeli jatatu jetejo.

¹⁴ Sho nda tara, onda mono otshikogo otshitokere, nde kotshikoko okua kaatumba gumue a f’omuna guomuntu, e notshishani tshotshingoldi komutse gue no meke rje oku notshimuico tshi nomeego.

¹⁵ Omujengeli gumue a hiri ta zi mo montempeli, ti igida neui enene ku nguija, ngu a kaatumba kotshikogo, ta ti: Kuata otshimuico tshohe u mue, oshoka erara rjetejo orje ja, rjo etejo rjuujuni rja ceta.

¹⁶ Ngu a kaatumba kotshikogo, ota kepurica nduno otshimuico tshe kombanda hevi, nd’evi rja tejua po.

¹⁷ Itshee omujengeli gumue ta zi montempeli, ndji hi ri meguru, na he uo ta kuata otshimuico tshi nomeego.

¹⁸ Omujengeli gumue a hiri ta zi kohaltari, ngu e nepangero momuriro, he ti igida neui enene ku nguija e notshimuico tshi nomeego, nde ta ti ku he: Kepurica otshimuico tshohe tshi nomeego, u tete iihimati jomukuamavinju guujuni, oshoka iihimati jaguo oja tirigana.

¹⁹ H’omujengeli ta kepurica nduno otshimuico tshe tshi nomeego, ta tete omukuamavinju guujuni, nde te gu umbire motshikuejo otshinene tshondjashi ha Karunga.

²⁰ Tsho otshikuejo otsha kuejerua pondje hotshirongo, nd’ombinzi tahi zi mo motshikuejo, ha tsa kiitomo juukambe meharandjandja rjeenkatu 1600.