Ehororo 12 - Etestemente Epe ✠ 1951

ONTOPORUA 12. Omadidiriko tago orora egeero.

¹ Mo meguru omuo oroka edidiriko enene: Omukiintu a zarekua etango, omuedi gu ri koshi heempadi de, nde komutse oku notshishani tsheenjoci 12.

² H’omusimba, ta kugu kokucetua, h’e nuudigu uokuvara.

³ Edidiriko ri iri rjo oroka keguru: Tara, otshikoko otshinene, tsha tirigana ngashi omuriro, tshi neemutse 7 neembinga 10, nde keemutse datsho oku niishani 7.

⁴ Omutshira guatsho otagu shiri otshititatu tsheenjoci do keguru konima hatsho, nde tatshi du umbire pevi. Tsho otshikoko otatshe engene komukiintu, ngu ta ara okuvara, opo nge a vara, tshi diragure okanona ke ngeno.

⁵ He ta vara ngaa okanona okarumentu, ka guana okupangera omarudi ageshe nodimbo hotsheera. Nd’okanona ka tuumbua ka he ku Karunga no kotshipangerapundi tshe.

⁶ H’omukiintu ta h’onda po mombuga, mu ta mono etsari, rje mu rongikidirua ku Karunga a ka parucirue mo omasiku 1260.

⁷ Mo meguru omua tukuruka orugodi orunene. Mikael naajengeli je otaa ru notshikoko, nd’otshikoko naajengeli jatsho uo taa kondjo.

⁸ Jo oja njengua okusinda, neshara rjauo inari monikua ue meguru.

⁹ Nd’otshikoko shija otshinene otshu umbirua muure, tsho ejoka ekuru, ndi hari tiua ondemoni na satana, ngu ha pukica uujuni aushe. Oku umbirua muure uopevi, jo aajengeli je oju umbirua mo na he.

¹⁰ Mpa andi uvu eui enene, tari zi keguru, rjo otari igida: Ngashiingika ehupico neenkondo nuukuaniirua oua ningua ua Karunga ketu, nepangero orja Kristus gue, oshoka omupopi guaamuameme oku umbirua mo, ngu e ja popa ku Karunga uusiku nomutenja.

¹¹ Jo oje mu sinda moru ombinzi hOnzigona no moru ohapu hehokororo, jo oja ri kaa hore eemuenjo dauo sigo okusa.

¹² Njanjukua nduno, ’guru, na ne aangandjamo. Ojeeje kevi no kefuta, oshoka satana okua ningine mu ne nondjashi onene, morua shi e tshi tshi, nokutja erara rje eshupi ouara.

¹³ Nd’otshikoko, sho tsha mono tshu umbirua pevi, otsha tida omukiintu, ngu a vara okamati.

¹⁴ H’omukiintu ota peua omauaua gaari gontsa ndjija onene, a tukire kombuga, keshara ho ta ka parucirua erara rimue nomarara gaari netata a hihupice kejoka.

¹⁵ Ndere ejoka tari sija mokana kuarjo konima homukiintu omeja ga f’omuronga, a ka faarerue komakucikuci.

¹⁶ Ndere evi orja kuacere omukiintu, oshoka orje ekama, rjo otari pono omuronga, ngu gua sijua kotshikoko.

¹⁷ Nd’otshikoko tatsi sir’omukiintu ondjashi, tsho otatshi hi tshi ka rue nojakuauo jorudi rue, mba taa diginine iipango ja Karunga, jo je nehokororo rja Jesus Kristus.