Ehororo 11 - Etestemente Epe ✠ 1951

ONTOPORUA 11. Aahokorori jaari taa tumua.

¹ Ngaje onda peua onenge ha f’otsheerekico, nde tii rombuerua: Cikama ngueje u ereke ontempeli ha Karunga nohaltari na mba taji injongamene ku ho.

² Ndere otshoto tshontempeli, shi tshi ri posha, tshe eca, ino tshe ereka, oshoka otsha peua aapagani, jo taa ka ratagura omukunda omujapuki eemuedi 42.

³ Otii ka pa aahokorori jandje jaari ja shunganeke omasiku 1260, jo ja zare eempunda duupongo.

⁴ Mbono eemono mbaari neenjeka mbaari, da cikama miipaci ja Muene guevi.

⁵ Nge ku na ngu a hara okujeepeka, omuriro otagu ka za momakana gauo, guo otagu diragura aatondi jauo, na nge ku na ngu a hara okujaninga neji, na dipague tuu.

⁶ Oje neenkondo dokuedira eguru, ovura kahi roke pomasiku geshunganeko, jo je neenkondo dokutshitukica omeja ombinzi, dokudenga evi notshiponga keshe, unaarushe nge ja ara.

⁷ Nde nge ja guanica ehokororo rjauo, otshirikama, shi tatshi zi muure uoposhi, otatshi shimbike okurua nokusindana nokujadipaga.

⁸ Eemudimba dauo otadi ka kara da rara meendjira domukunda omunene, ngu hagu tiua pajere Sodoma na Egipte, hu Muene guauo a ri a dipagerua komutshigakano.

⁹ Ojendji jo momazimo no jo momarudi no jo miirongo no jo momaraka otaa ka tara eemudimba dauo omasiku gatatu netata, do eemudimba itadi pitikua di turue mombira.

¹⁰ Aantu jo kombanda hevi otaa ke di njanjukirua, taa ka rigora, jo otaa ka tuminacana omagano, oshoka aaprofeti mba jaari oje epeka aantu jo kombanda hevi.

¹¹ Ndere omasiku gatatu netata nge ga piti po, eembepo deemuenjo otadi zi ku Karunga, do tadi tshuna mu do, do otadi cikama keempadi dado, nde ajeshe, mba taa di mono, otaa ka tira unene.

¹² Jo otaa huvu eui enene, tari zi keguru, rjo otari ti ku jo: Rondeni mpa! Jo otaa rondo keguru motshikogo, jo aatondi jauo taa ja mono.

¹³ Perara ndika ekekamo rjevi orjo oroka, otshitimurongo tshomukunda tatshi gu ko, nde kekamo rjevi aantu 7000 ja dipagua. Mba ju upa ko, oja kuatua kuumbanda, jo oja pa Karunga guo meguru esimano.

¹⁴ Ojeeje ontijari ha pita po, ndere tara ko, ojeeje ontitatu opo tahi ja.

¹⁵ Omujengeli omutinuuari ta shiki embendo, go omaui omanene ogu uvika meguru, nga taga ti: Uukuaniirua u’uujuni mbu oua ninga ua Muene guetu, h’Omuguajekua, he ta ka pangera sigoosigo. Amen.

¹⁶ Nd’aakuruntu mbeja 24, mba ja kaatumba miipaci ja Karunga kiipundi jauo, taji isizimike kiipara jauo, taji injongamene ku Karunga, jo otaa ti:

¹⁷ Muene Karunga omunankondo adishe, ngu u ri ko, ngu ua ri ko, ngueje to ke ja, otue ku pandura, oshoka oui ipa eenkondo eenene, ngueje ui ihorora ong’omupangeri.

¹⁸ Omarudi oga s’ondjashi, nd’ondjashi hohe he ja uo, nerara rjokupangura aasi nokupa ondjambi aakareri naaprofeti naajapuki johe najeshe, mba ja tira edina rjohe, aashupi naakengeri, nerara rjokujona po ajeshe, mba ja jona.

¹⁹ Ho ontempeli ha Karunga guo meguru ohe egururua, notshikeca tsheguaneno rje otsha monika. Eembadi odo oroka nomaui nomakekamo neempague eedigu.