Ehororo 1 - Etestemente Epe ✠ 1951

ONTOPORUA 1. Epopico.

¹ Ehororo ndika orja Jesus Kristus, Karunga e ri mu pere, e rje epururire aapija je, nokutja ajishe, mbi taji ka ningua masiku; okue je epururire omupija gue Johannes nokumutumina omujengeli.

² Nguka a hokorora ohapu ha Karunga nehokororo rja Jesus Kristus, nokutja ajishe mbi a mono.

³ Omunerago ohe ngu ta resha, he tu uvu eehapu deshunganeko, nde ta diginine uo mbi ja tshangua mo; oshoka erara orja cika.

⁴ Ekundo rja Johannes komagongaro 7 go mu Asia: Sirueni oshenda, nombiri na ne ha nguija, ngu e ri ko, ngu a ri ko, h’onakuja no heembepo 7 itshee, di di ri potshipangerapundi tshe.

⁵ No ha Jesus Kristus, omuokorori omudiginini, omuvarua otsheeri guaasi h’omupangeri guaakuaniirua juujuni, ngu a ri e tu ore, he e tu jereka eendjo detu mombinzi he.

⁶ Ngu e tu ninga aakuaniirua ss’aapristeri ja Karunga She. Na ambererue, he na pangere sigoosigo. Amen.

⁷ Tareni, h’ote ja, te ende miikogo. Omesho ageshe onage mu mono, no ga mbeja uo, mba je mu urura. Omarudi ageshe guujuni onage mu kemene. Eno. Amen.

⁸ Ongaje Alfa na Omego, nokutja etameko neshuriro: Muene Karunga otsho ta ti, ngu e ri ko, ngu a ri ko, h’onakuja, h’omunankondo.

⁹ Ngaje, Johannes, mumuanjoko, ngaje mukueni miishuna no muukuaniirua no mehididimikiro mu Jesus Kristus, onda ri mokarongo mokati kefuta, ki icanua Patmos, moru eehapu da Karunga no moru ehokororo rja Jesus Kristus.

¹⁰ Mesiku rja Muene onda ri mombepo ho komuenjo, nde tandi uvu konima handje eui enene rja fa rjembendo, tari ti:

¹¹ Shi to mono, tshi tshanga membo, ngueje u tshu unzire omagongaro 7 go mu Asia: go mu Efesus no mu Smirna no mu Pergamos no mu Tiatira no mu Sardes no mu Filadelfia no mu Laodisea.

¹² Andi punguruka ano, ndi tare eui, ndi tari popi na ngaje, nde sho nda punguruka, onda mono eenjeka diingoldi 7.

¹³ Ndere mokati keenjeka diingoldi 7 ondi uete gumue a f’omuna guomuntu, a zara eruakani, rja mangua nepaja rjiingoldi ponturo.

¹⁴ Omutse gue nomafufu gago oga toka to ngashi omafufu geenzi, ga f’omeegere, nd’omesho ge ga f’omuriro gua jeta.

¹⁵ Eempadi de oda f’otsheera tsha jeta, tsho tsha tirigana meziko, nd’eui rje ong’omeja ogendji taga pupu.

¹⁶ Meke rje a kuata eenjoci 7, mokana kue tamu zi omuere gu nomeego keembinga mbaari, nd’otshipara tshe tsha f’etango tari minikire neenkondo.

¹⁷ Sho nde mu mono, ondi ishata po keempadi de, nda ri nda fa nda sa. Nde he ta tenteke ndje eke rje rjokurjo, ta ti: Ino mbandara, ngaje omutango, ngaje omushugunini.

¹⁸ Ngaje omunamuenjo; onda ri nda sa, ndere tara, ondi nomuenjo sigoosigo, ngaje ondi noshapi heso no hoheri.

¹⁹ Tshanga nduno, shi ua monene, shi tshi ri po na shi tatshi ke ja nofu.

²⁰ Otshoorekua tsheenjoci dija 7, di ua monene meke rjandje rjokurjo neenjeka diingoldi 7, otsho shika: eenjoci 7 odo aajengeli jomagongaro 7, nde eenjeka 7 odo omagongaro 7 gojene.