2 Timoteus 4 - Etestemente Epe ✠ 1951

ONTOPORUA 4. “Omakumagido”

¹ Otii ku ganica ku Karunga no ku Jesus Kristus ngu ta ka pangura aanamuenjo naasi pejo rje ndi ari ke ja no kotshirongo tshe.

² Uvica ohapu, diginina pecimbo rj’opara nenge inari opara, tompa, kumagida, geera nonteni nokuronga nuunkurungu arushe.

³ Oshoka ecimbo otari ja, jo kaa hara ue omarongo ga kora, aaue, otaa k’ikongera aarongi mba haa njuica omakutsi gauo pa uuharu uauo jene.

⁴ Inaa hara okuuva eehapu dotshiri, jo taa gama keengano.

⁵ Ndere ngueje kotoka, umbata uudigu aushe, ronga otshironga tshomuhuvici guevangelium, guanica ejakuro rjohe, kara nehidiriko.

⁶ Ote kucua nokuri ng’egano rjoshura. Ecimbo rjokuza kuandje ori ri popepi.

⁷ Onda kondja ekondjo ehanaua, nda shurica ematuko, ngaje nda pungura ehiteero.

⁸ Nena ondjambi huujuki oha rongekidiruandje, Muene omupanguri omujuki te ke hi pandje esiku ndioka nde ngaje ha ngaj’ike, najeshe tuu ngaa mboka je ore okuja kue. Enderera ngueje u je kungaje masiku.

⁹ Oshoka Demas okua ecandje moru’ohore huujuni mbuka. Okua hi ku Tessaloniki.

¹⁰ Kreskens a hi ku Galatia. Titus ku Dalmatia.

¹¹ Lukas ohiike e ri po pungaje. Kuca Markus a kare pungueje, ngueje to ja na he. Onda pumbua iironga je.

¹² Onda tuma Tishikus ku Efesus.

¹³ Nge to ja, eterandje uo eruaakani ndija nda ciga pu Karpus mu Troas nomambo neempapira doka domapergamenti.

¹⁴ Aleksander omuhambudi okua ningirandje uuhineje oundji. Muene ote ke mu pa tshi cike piironga je.

¹⁵ Nangueje uo mu kotokera. Okua kondjica neenkondo eehapu derongo rjetu.

¹⁶ Sho nda purua tango, kapu na nand’ogumue a popirandje, aaue, oj’ecandje ajeshe. Ando inatshi ja jarurirua.

¹⁷ Ndere Muene okua cikama ponto handje, a korekandje, evangelium ri uvicue kungaje, naapagani ajeshe je ri uve. Nde ngaje nd’upicua kokana konkoshi.

¹⁸ Muene oku’upicandje kiironga ajishe juuhineji, nde ota ka kuacandje okuha motshirongo tshomeguru, ohe na simanekue arusherushe Amen.

¹⁹ Kundira po Priska na Akuila, negumbo rja Onesiforus.

²⁰ Erastus a kara mu Korint. Trofimus onde mu ciga ku Milet, a ri t’ehama.

²¹ Enderera u je manka okufu inaku ja. Oto kundua ku Eubulus, Pudens Linus, ku Klaudia no kaamuameme ajeshe.

²² Muene Jesus Kristus na kare nombepo hohe. Oshenda nahi kare na ne Amen.