2 Timoteus 3 - Etestemente Epe ✠ 1951

ONTOPORUA 3. “Aarongi jiirombo”

¹ Ou nokutshiua nena nokutja omasiku ga shugunina aga ningi omacimbo omadigu.

² Aantu taa k’ihora jojene ike, je nuuharu ueriko, taa ka itanga, aanuuntsa aatsheki, kaa vurika kaakuruntu, kaa nepandu, aarunde.

³ Kaje nohore, kaa nombiri, haa rundire, kaa nehidiriko, je nonjanja, ka nesiroshenda.

⁴ Aagoueki, aadudu, haa korouara. Ohore hauo hokuora uuharu uuhineji hi vure ndji hokuora Karunga.

⁵ Ja fa je nuujuki, ndere kaa neenkondo duujuki. Ja angara.

⁶ Mokati ka mboka omu na uo mbeja haa guajere mo momagumbo, taa himangereke kaakiintu aankundi, mba haa pangerua komaharu ogendji, ja kuatua kuurunde.

⁷ Ohaa rongua arushe, ndere ketshiuo rjotshiri itaa hada ko.

⁸ Ngashi Jannes na Mambres ja ri ja tsondumbo na Moses, otsho na mboka otaa tsondumbo notshiri, jo aantu jeendunge da pirarara, nehiteero rja gojoka.

⁹ Ndere itaa hi kokure mondjira ndji. Uurai uauo otau k’orokera ajeshe ngashika mbejaka ja ningirue uo.

¹⁰ Ndere ngueje ua randurandje momarongo, meendjenda, meenkembadaro, mehiteero monteni mohore no mehididimiko.

¹¹ Momatidatido no momeepeko ngashi ngaje nde ga mona mu Antiokia mu Ikonium no mu Listra. Omeepeko gandje oge cike peni? Ndere Muene oku’upicandje mu go ageshe.

¹² Najeshe mba ja ara okupitica omasiku gauo ng’aajuki mu Kristus Jesus, otaa ka hepekua.

¹³ Ndere aantu aahineji naapukici otaa tsikire ko uuhineji, oshoka jo oonakupuka jo aapukici.

¹⁴ Ndere ngueje kara pu mbjoka ua rongua no ue ji peua. Ngueje ou tshi ngu e ku ronga.

¹⁵ Okuza kerara rjuunona uohe ou tshi omatshangua omajapuki, ogo tage ku rongo okumona ehupico kehiteero rjokuiteera Kristus Jesus.

¹⁶ Otshitshangua keshe shi tsha tshangua keharo rja Karunga otshi noruporo kerongo, kekumagido, kepukururo no keputudo rjomuujuki,

¹⁷ opo omuntu gua Karunga ta ningi a guana a pua, onkurungu pokuronga iironga iihanaua.