2 Timoteus 2 - Etestemente Epe ✠ 1951

ONTOPORUA 2. “Ondjambi haadiginini”

¹ Ano nduno mumuandje, kara omunankondo moshenda ndji hi ri mu Kristus Jesus.

² Na shoka ua uva kungaje momahokororo ogendji, ou tshi pa uo aantu mba haa vuru okuinekerua, mba je tshi uo okuronga jarue.

³ Ronga ngashi omukuiita omuhanaua gua Jesus Kristus.

⁴ Omukuiita gua Karunga k’ipjakidirira iironga jopajuni, opo a pandikue ku ngoka a higandjera.

⁵ Na ngoka ta matuka ematuko rjecigacano, ita peua ondjambi hesindano, nge ina matuka pamukaro.

⁶ Omurongi guepja ngu ha rongo, na rje tango iirja.

⁷ Uva naua doka andi ku rombuere, oshoka Muene ote ku pe eendunge domiinima ajishe.

⁸ Dimburukua, Jesus Kristus omukuazimo gua David, okua jumuka kuusi kevangelium rjandje.

⁹ Ndioka ngaje nd’epekerua, nda mangerua nda f’omukorokoshi. Ndere ohapu ha Karunga inahi mangua.

¹⁰ Otsho ngaje hand’ididimikire aahogororua atshishe, jo ja mone uo ehupico ndi ri ri mu Kristus Jesus nehadimo rjomeguru.

¹¹ H’ohapu hotshiri: Nge tua si puamue na he, ss’atu ka kara uo nomuenjo puamue na he.

¹² Nge tu nehididimiko, ss’atu ka kara uo puamue na he mepangero. Nge tatu idimbike, he ote ke tu idimbika uo.

¹³ Nge katu nehiteero, he ta kara ngaa omudiginini, ita vuru okuidimbika he muene.

¹⁴ Doka di ja dimburuca noku ja kumagida kotshipara tsha Muene. Ino tamanana neehapu douara. Itadi kuaca tsha, adi pukica orundji aapuakeni.

¹⁵ Kembadara nerama ngueje u monikue motshipara tsha Karunga ng’omurongi omudiginini, ngu ita soshoni, ta rongo ohapu hotshiri neendunge.

¹⁶ Enuka eehapu dopajuni nejejagano ari kokica odinokarunga.

¹⁷ Eehapu dauo adi ka njua ngashi odija. Mokati kauo omu na Himeneus na Filetus.

¹⁸ Oja puka motshiri sho ja ti: ejumuko orja ningi nare. Ohaa shanagura ehiteero mu jamue.

¹⁹ Ndere omukanka gua kora gua Karunga agu kara gua pama. Ogu nedidiriko ndi: “Muene oku tshi aantu je” nekuauo, “Keshe ngoka ta tumbura edina rja Karunga, n’ece uurunde.”

²⁰ Mondjugo onene kamu na ike iijuma ja ningua notshingoldi notshisilveri, aaue, omu na uo mbika jiiti no jeroua. Jimue ja simana, jimue inaji simana.

²¹ Nge ku na gumue t’ijereke ku mbika, ota ningi otshijuma tsha simana, tsha japurua, tsh’oparera Muene, onkurungu pokuronga iironga iihanaua.

²² Kara kokure nuuharu uopanjasha. Kembadara u mone uujuki, ehiteero, etegerero ohore nombiri puamue na mboka haa hicana Muene nomutima gua jera.

²³ Tshirika omapuro guurai, nga inaga tsa pomarongo, oshoka ou tshi nokutja go aga eta eentamanana.

²⁴ Ndere okutamanana inaku oparera omupija gua Muene. He na kare nombiri na ajeshe, onkurungu mokuronga, h’omunanteni.

²⁵ A pukurure nengungumano mboka je nondumbo notshiri. Karunga te j’idirururica ngiika, jo ja dimburure otshiri.

²⁶ Jo ja pukuruke, ja manguruke mo momuigo guomusatana, ngoka e ja manga keharo rje.