2 Petrus 2 - Etestemente Epe ✠ 1951

ONTOPORUA 2. Angareni aapukuci.

¹ Ndere omua ri uo aaprofeti aaniirombo motshiguana, ngashika taa ka monikua uo mokati keni, aarongi aaniirombo. Jo taa ja nomarongo omiineji giirombo. Taa hidimbike Muene ngu e ja kurire. Taa hirongere jo jene ekano, ndi ari ja akana naanzija.

² Ojendji otaje ja ramba muuhineji uauo. H’ondjira hotshiri tahi njanua morua mboka.

³ Muuharu ueriko otaje mu tshendjereke neehapu domakoto. Ndere epanguro rjauo rjegeero itari arura okuja, rjo ejonuko rjauo kari koca.

⁴ Oshoka Karunga ina sir’aajengeli aarunde oshenda. Nomarjenge gomuriro guarushe okue ja shirire mo muure uomoshi, te ja gandja komeepeko noku ja pungurira epanguro.

⁵ Ina sir’uujuni uonare oshenda, aaue. Noe ike omuhuvici gu’uujuki, h’omutiuunutatu e mu upica, ejeru sho a jerurica uujuni uaarunde.

⁶ Okua tshitukica iirando Sodoma na Gomorrha omutoko noku ji pangurira eshanaguro, ji kare iitirico ja mboka j’eca Karunga.

⁷ Ndere oku’upica Lot omujuki, ngu a hepekua unene keemkaro eemhineji daadudu mbono.

⁸ Oshoka piinima mbi ajishe mbi a tara he a huva, he muene okua kara omujuki nanto a menekera mokati ka mboka j’ehameka keshe esiku omuenjo gue omujuki niironga iihineji.

⁹ Otsho Muene e tshi okuupica aajuki memakero nokupungurira aakorokoshi esiku rjepanguro kegeero rjauo.

¹⁰ Shoka otsha tsa unene pu mboka haa hende muuharu uuhineji uonjama, haa dini aapangeri, kaa tira muufure uauo u’uurai okuninga omatopoko noku ja tsheka,

¹¹ nanto aajengeli mba je ja vure meenkondo no muunene kaje ja tukagura.

¹² Jo ja f’iijamakuti mbi kaji neendunge, mbi ji ri po ji kuatue, ji dipague. Ohaa tsheke shoka kaa tshi tshi, jo taa ka jonuka po muuhineji uauo.

¹³ Otaa ka mona ondjambi huumbudi uauo. Okugarangata muuhineji uoshoni esiku rimue okuo erago meendunge dauo. Ojo onigi, je nokusirua oshoni nge haa ningi iituci puamue na ne.

¹⁴ Omesho gauo g’uda oruhondero. Itaa kuta mokujona. Haa mbembereke eemuenjo kadi neenkondo. Omutima guauo ogu’igirira uuharu ueriko. Ojo aana jecingo.

¹⁵ Oj’eca ondjira h’uka, haa puka. Ohaa randura ondjira ha Balaam omumua Bosor, ngu a ri e hore ondjambi huurunde.

¹⁶ Ndere okua pukururua muurai ue. Ondonkiri ndji kahi tshi ku popja, oha popja eraka rjaantu nokukerera uugoua uomuprofeti.

¹⁷ Mboka oja f’eecicija kadi nomeja. Jo iikogo j’endaendicua kotshikunguru. Jo ja pungurirua eemrema docokocoko.

¹⁸ Otaa popi eehapu duurai montsinu hauo. Nomaharu gonjama ohaa fara muuhineji uoshoni mboka j’eca nomerara tuu ndika ondjira hepuko.

¹⁹ Otaje ja rombuerere emangururo, nanto jo jene aapika jejonuko, oshoka keshe gumue omupika gua shoka tshe mu sindirira.

²⁰ Oshoka mba ja cigi po uuhineji u’uurunde, sho ja tshiua Muene nomukuriri guetu Jesus Kristus, ndere taa kuatua itsheue ku uo nde taa sindua, nena iinima ja shugunina otaji ningi iihineji pu jo, ji vure mbi jotango.

²¹ Ngeno okua inaa tshiua ondjira huujuki, shuepo, ku vure oku hi tshiua tango nokueca komesho otshipango otshijapuki shi ja peua.

²² Ohapu homeere gotshiri oha tsa pu jo: “Ombua otahi ri onkungo haho” na itsheue “Otshinguru shi tsha koshua, otatshi garangata menono.”