2 Petrus 1 - Etestemente Epe ✠ 1951

ONTOPORUA 1. Diginineni ehiteero.

¹ Simon Petrus, omupija h’omuapostoli gua Jesus Kristus, ku mboka ja mon’ehiteero rimue, ndi orjetu uo, moru’uujuki ua Karunga nomukuriri guetu Jesus Kristus.

² Kareni mu’uda oshenda nombiri ndji ha zi mokutshiua Karunga na Muene guetu Jesus Kristus.

³ Eenkondo de da Karunga ode tu pa atshishe shoka tua pumbua, tu kare nomuenjo metirokarunga. Okue tshi tu pa oshoka tua tshiua nguka e tu icana mehadimo no meenkondo de.

⁴ Otsho e tu pa omarombuerero ga simanenena go omanene, opo mu guanekue nomuenjo gua Karunga, ne mu enuke ekano ndi rja zi muuharu uuhineji u’uujuni.

⁵ Kembadareni ano, ne mu kare neenkondo mehiteero rjeni. Mo meenkondo mu kare etshiuo.

⁶ Metshiuo mu kare ehidiriko. Mo mehidiriko mu kare onteni. Monteni etirokarunga.

⁷ Metirokarunga mu kare ohore hokuora aamuahina. Mohore hokuora aamuahina ohore hokuora aantu ajeshe.

⁸ Nge omu na iinima mbika, na nge omu ji na ojindji, jo itaji mu eca ne mu nomupja, kamu niihimati mokutshiua Muene guetu Jesus Kristus.

⁹ Ndere ngu ke ji na, ohe omuposi, ta pampadara nomake, a dimbua ekuciropo rjeendjo de donare.

¹⁰ Ano jamuameme, kembadareni, okukoreka ehicano nehogororo rjeni niironga iihanaua. Nge tamu ningi ngiino, itamu ka jona.

¹¹ Otsho tamu mono ompito onene hokuha motshirongo tsharushe tsha Muene guetu tsho tshomukuriri guetu Jesus Kristus.

¹² Opo te zi ku mu dimburuca arushe iinima mbika, nanto omu ji tshi, ne mua dama ngashingika meehapu dotshiri.

¹³ Oshoka keendunge dandje otsho otshipango tshandje tshoku mu pendura nomakumagido manka ngaje ndi ri mokatsari haka.

¹⁴ Ondi tshi nokutja okatsari kandje taka dikurua po masiku, ngashi nde tshi ororerua ku Muene guetu Jesus Kristus.

¹⁵ Otandi ipjakidire ne mu dimburukue uo orundji iinima mbika nge nda si.

¹⁶ Oshoka sho tue mu uvicire eenkondo nehoroko rja Muene guetu Jesus Kristus, sse inatu okorora eengano di da zi meendunge daantu, aaue, ss’otua ri eentari dehadimo rje.

¹⁷ Oshoka okua peua ku Karunga She esimano nehadimo, sho a hadikua keui rja zi muujerere uehadimo rjokombandambanda rja ti: “Omumuandje ngu omuhorike, ngaje nde mu okua. Mu uveni.”

¹⁸ Neui ndika ndi rja zi meguru, ss’otue ri uvu, sho tua ri puamue na he kombanda hondundu ondjapuki.

¹⁹ Nde ss’otu na uo ohapu ha korerera, ndji haaprofeti. Otsh’uka ngaa nge tamu gama ku ho ng’uujerere mbu au minikire meemrema ndongo otaku tshi, h’onjoci hongura tahi piti meemuenjo deni.

²⁰ Oshoka omu noku tshi kuata meendunge deni nokutja eshunganeko keshe rjo mobibeli inari za momafatururo gaantu.

²¹ Eharo rjaantu inari eta omashunganeko, aaue, aantu aajapuki ja Karunga ja popja meenkondo da Karunga Ombepo Ondjapuki.