2 Kaakorinti 7 - Etestemente Epe ✠ 1951

ONTOPORUA 7. Omuapostoli naakorinti

¹ Sho tu na ano omarombuerero ga tja ngaaka, jahorike, sse otua ara tu ikerere onigi keshe honjama no homuenjo, tu guanice ejapuro rjetu metirokarunga.

² Tu uveni naua! Inatu ningira gumue uuhineji, inatu pukica, inatu tshendjereka gumue.

³ Itandi popi dika ngaje ndi mu pangure, oshoka onde tshi mu rombuera, ne mu ri momutima guandje, sse tu kare jamue momuenjo no mokusa.

⁴ Onde mu inekera unene. And’itanga unene morueni. Ond’uda ehekerero nenjanju muudigu aushe.

⁵ Sho tua cika ku Makedonia, orutu ruetu inaru mon’evururuko, aaue, omacinaneko ogendji, tua kondekua komakondjico, meni rjetu mua ri etiro.

⁶ Ndere Karunga ngu h’ekererica aanuupongo, okue tu ekererica nejo rja Titus.

⁷ Nejo rje ike, aaue, no nehekererico ndi a mona pune. Okue tu okororera ejeeruko rjeni, nomoodi geni, nerama rjeni moruandje. Enjanju rjandje orja ningi enene.

⁸ Oshoka ngaje, nge nde mu nikic’uupongo nombrife handje, itandi hi ipere ombedi. Na nge nd’ipa ombedi, sho nda mona nokutja ombrife ndjika he mu nikic’uupongo, nanto okarara okatshona,

⁹ ngaje ondi nenjanju nena, ha moru’uupongo ueni, aaue, ndere uupongo sho ue mu fara kehidirururo. Otsho mpo pua ri uupongo, Karunga e u hokua. Nde ngaje inandi mu monic’otshiponga.

¹⁰ Oshoka uupongo uokeharo rja Karunga otau eta ehidirururo rjotshiri nehupico. Uupongo uopanjama otau eta eso.

¹¹ Tareni shoka tsha tutuma pune muupongo mbuka uokeharo rja Karunga, uuradi uunene, nehipopiro, nokuipa ombedi, netiro, nejeeruko, nuufure, negeero. Niinima mbi ajishe ne mua tompandje, nokutja kamu nondjo motshinima shika.

¹² Ano nduno, inandi mu tshangera morua ngo a ninga neji, nenge morua ngo a ningirua uuhineji, aaue, ngaje ondi mu urukire uuradi uandje, mbu ndi na morueni motshipara tsha Karunga.

¹³ Otsho sse tua mono ehekerero rjetu. Mehekerero rjetu sse tua njanjukirua unene enjanju rja Titus, oshoka omuenjo gue gua tararekua unene kune amushe.

¹⁴ Ngaje nge nde mu amberera kotshipara tshe, inandi gugicua. Ongashi eehapu dandje adishe, di nde mu rombuera, odo dotshiri, nomaamberero getu pu Titus og’otshiri.

¹⁵ He e mu ore nomutima agushe, sho a dimburukua evuriko rjeni amushe, nde mue mu tuumba netiro nekekamo.

¹⁶ Onda panda tshiri, sho te vuru oku mu inekera mu ajishe.