2 Kaakorinti 4 - Etestemente Epe ✠ 1951

ONTOPORUA 4. Eenkondo da Karunga muunkundi uaantu

¹ Nena nduno, sho tua peua ejakuro ndika moru’esiroshenda rja Karunga, itatu ka vurua.

² Otua dina iironga iihineji jomehoramo, katu pirike eehapu da Karunga nomakoto, aaue, ehipopiro rjetu rjopehuvo rjomutima guajeshe orjo ehuvico rjetu rjotshiri rjo rjehororo rjatsho motshipara tsha Karunga.

³ Evangelium rjetu nge rja siikirua, orja siikirirua mboka ike taa ka kana.

⁴ Okutja mboka kaa nehiteero, karunga kuujuni mbuka okua kukutika eemtima dauo, jo kaa minikirue kuujerere uevangelium rjehadimo rja Kristus, ohe otshifeca tsha Karunga.

⁵ Sse itatu ihuvica sse jene aaue, oJesus Kristus Muene guetu. Ndere sse otua f’aapija jeni meenkondo da Jesus.

⁶ Oshoka Karunga ngu a tja: “Meemrema namu ze uujerere, tau minikire,” ohe tuu ngoka a minikira uo eemuenjo detu, tu jerice etshiuo rjehadimo rja Karunga ndi rja zi mu Kristus Jesus.

⁷ Ndere eriko ndika atu umbata miijuma jeroua, opo tsh’oroke nokutja eenkondo di eenene inadi za musse jene, aaue, omu Karunga.

⁸ Atu cinanekua keembinga adishe, ndere itatu si kuumbanda. Atu mon’iishuna, ndere itatu rimbirirua.

⁹ Ss’atu tidatidua, ndere inatu cigua po. Tatu shatua po, ndere itatu si.

¹⁰ Arushe atu umbata omeehamo gokusa kua Jesus korutu ruetu, opo omuenjo gua Jesus gu oroke uo korutu ruetu.

¹¹ Morua Jesus, sse aanamuenjo atu gandjua arushe keenkondo dokusa, opo omuenjo gua Jesus gu oroke monjama hetu ndji ahi si.

¹² Otsho eso ari rongo musse, omuenjo omune

¹³ Ndere sho tu na ombepo himue hehiteero, ngashi tsha tshangua: Ond’iteera, ano nda popi, “otsho nasse tu’iteera, ss’atu popi.”

¹⁴ Sse otu tshi tshi nokutja ngoka a jumuda Jesus, ohe te tu jumuda uo puamue na Jesus, he te tu tura kumue na ne.

¹⁵ Oshoka atshishe otsha ningua morueni, opo oshenda hi ninge ohindji, ho hi pandurice ojendji kesimano rja Karunga.

¹⁶ Otsho sse itatu vurua. Nanto omuntu guetu guokombanda ta jonuka po, ngu guomeni ta peua eenkondo eempe keshe esiku.

¹⁷ Oshoka uudigu uetu uonena u nuure uepacimo rjesho nuupu, tau tu monica ehuderera rjehadimo rjarushe, rjo ri vure atshishe.

¹⁸ Ndere inatu ara okutara kiinima mbi uetikue, aaue, oku mbi kaji uetikue. Oshoka mbi ji uetikue aji kara okarara okashupi, ndere mbi kaji uetikue itaji shuru po.