2 Kaakorinti 3 - Etestemente Epe ✠ 1951

ONTOPORUA 3. Ejakuro rjomuapostoli

¹ Atu shimbike itshee nduno tu itange sse jene? Nenge sse otua pumbua eembrife doku tu popira ngashi jamue, do mua tshangerua nenge da tshangua kune?

² One jene ombrife hetu. Oha tshangua momutima guetu, hahi dimbururua ho ha leshua kaantu ajeshe.

³ One ombrife ha Kristus, ha turua porueera, ha rongua kungaje, inahi tshangua nondomo, aaue, onombepo ha Karunga omunamuenjo, miirei jomamanja, aaue, omiirei jonjama homutima.

⁴ Ehinekero rja tja ngaaka otu ri na mu Karunga morua Kristus.

⁵ Ha moru’eenkondo detu, sse tu kare na do okudiradira tsha musse jene, aaue, eenkondo detu da zi mu Karunga.

⁶ He e tu ronga tu ninge aakareri jeguaneno epe, ndi kari shi eguaneno rjokatshangua, aaue orj’Ombepo, oshoka okatshangua taka sica, nde Ombepo tahi gandja omuenjo.

⁷ Ndere ejakuro rjeso ndioka, rja ri rja tshangua neendanda momamanja, nge rja ri nehadimo enene, rja njengica aana ja Israel okutara otshipara tsha Moses, nanto ehadimo ndika rja shura po nzija.

⁸ Nena nduno ejakuro rj’Ombepo kari na nani ehadimo ndi ri vure uneenene ndija?

⁹ Nge ejakuro rjepanguro rja ri nehadimo enene, nena ejakuro rjehuco rjuujuki ri nehadimo ri vure unene ndijaka.

¹⁰ Eno, ehadimo ndi rjonare ari dimua mehadimo ndi enene.

¹¹ Nge shoka atshi shuru po, tsha ri nehadimo, nena ehadimo rja shoka katshi na atshi atshi shuru, ori cike peni?

¹² Meenkondo detegerero ndi enene, ss’atu rongo nuufure.

¹³ Inatu fa Moses ngu a siikira otshipara tshe, aana ja Israel kaa tare shoka atshi shuru po.

¹⁴ Ndere eendunge dauo odi ri meemrema. Osigo onena otshisiikiro shika atshi kara po pokulesha etestamente ekuru, oshoka atshi kucua po ku Kristus ike.

¹⁵ Eno, sigo onena tuu ndjika opu notshisiikiro kombanda heemuenjo dauo, nge taa lesha Moses.

¹⁶ Ndere nge j’idirurura, taa hi ku Muene, otshisiikiro otatshi kucua ko.

¹⁷ Oshoka Muene ohe Ombepo. Apeshe mpo pu n’Ombepo ha Muene, opu nemangururo.

¹⁸ Ss’atushe atu tara niipara ja sukururua ehadimo rja Muene ngashi motshikengerero. Nde atu ka tshiturua ecano rja ndioka ari koko arushe muujerere moru’Ombepo ha Muene.