2 Kaakorinti 2 - Etestemente Epe ✠ 1951

ONTOPORUA 2. Omurunde a hidirurura ka tindirue esiroshenda

¹ Nena ngaje onda shind’eharo ndika nokutja kandi je ue ku ne nge ondi noku mu sic’uupongo.

² Ngaje nge nde mu sic’uupongo, ore nduno ta vuru okunjanjudandje? Ohiike ngu a pongicua kungaje.

³ Otsho ngaje onde mu tshangera ngii, opo ngaje kandi mone uupongo oundji pu mboka je nokunjanjudandje. Ondi nehinekero ndika mu ne nokutja enjanju rjandje orjo uo rjeni amushe.

⁴ Ngaje nde mu tshangera nomoodi ogendji nuudigu no muumbanda uomutima guandje, ngaje opo ndi mu pongice? Aaue, ngaje ondi mu urukire uunenene uohore handje.

⁵ Nge opu na ngu a heta uupongo, ina pongicandje ike ngaje, aaue, ondi tshi, inandi ara okukara nomutoto, konjara ajeshe.

⁶ Egeero, ndi a mona sho a pangurua kojendji, orja guana nena.

⁷ Nena ano dimeni po ondjo he noku mu ekererica, he ka ningine muupongo uudigudigu.

⁸ Otsho andi mu indire ne mu koreke itshee ohore heni hoku mu ora.

⁹ Opo nda zi uo oku mu tshangera ngaje ndi mu makere nge omu nevuriko miinima ajishe.

¹⁰ Ngu a kucirua po ondjo kune, okua kucirua po ondjo kungaje, oshoka atshishe nda dima po, nge nda ri nda dima po eendjo, onde tshi ningi morueni no medina rja Kristus.

¹¹ Inatu ara okukotokerua komusatana. Omakoto ge otu ga tshi.

¹² Evangelium rja Kristus, sho rja faricandje ku Troas, ngaje ond’egururirua otsheero mu Muene.

¹³ Ndere inandi mon’evururuko momuenjo guandje, sho inandi tsakaneka Titus omumuameme. Ano onde ja rareke, ngaje te hi ku Makedonia.

¹⁴ Karunga na ambererue! He te tu sindica arusherushe mu Kristus Jesus noku tu taanderica apeshepeshe ezimba ehanaua rjokutshiua kue.

¹⁵ Oshoka pu Karunga, sse ezimba ehanaua rja Kristus mokati ka mboka taa hupicua no mokati ka mboka taa kana.

¹⁶ Pu mboka ezimba rjeso keso, pu mbejaka ezimba rjomuenjo komuenjo. Ore te ri guanene ngaano?

¹⁷ Oshoka sse inatu fa mbeja ojendji haa rundurura ohapu ha Karunga, aaue, atu hi uvica motshiri keharo rja Karunga, motshipara tsha Karunga, mu Kristus.