1 Timoteus 6 - Etestemente Epe ✠ 1951

ONTOPORUA 6. Aapija naajamba mokati kaakriste

¹ Ajeshe mba ja tsikua ondjoko huupika, naa simaneke tshiri oojene jauo, edina rja Karunga nerongo kari tshekue.

² Mboka je noojene aahiteeri, kaje ja dine, oshoka ojo aamuahina. Aaue, naje ja rongere neharo arishe, oshoka ojo aahiteeri, jo aahorike, je noruporo ruauo puamue na jo motshironga otshaanaua. Otsho ngueje ou nokuronga nokukumagida.

³ Nge ku na ngu ta rongo eehapu dirue, ina dama eehapu eembuanaua da Jesus Kristus nerongo ndi ari fara kerago rjomu Karunga,

⁴ he okua furakata, ke na eendunge. Ot’ihehame nomapurapuro gomarudi neentamanana moru’eehapu douara. Mu amu zi okasheshe, ondumbo, omarundiro, omadiradiro omiineji,

⁵ eentamanana daantu, mba je neendunge da pirarara. Kaje na ue otshiri, jo je tshi kutja okurongera Karunga okuo otshironga tshokuirongera eriko.

⁶ Otshiri, merongerokarunga omu neriko enene, nge inari guanekua nuuharu ueriko.

⁷ Oshoka inatu eta tsha muujuni sho tue ja. Otsho kapu nomarimbiriro kutja atu ka kara katu na tsha nge atu ka za mo.

⁸ Nge otu niiparuca neenguuo, natu pande.

⁹ Mboka ja ara kuninga aajamba, otaa guire memakero no momuigo guomusatana. Taa kuatua komaharu ogendji kage noruporo, nde go oge notshiponga. Go tag’undurire aantu meshanaguro no mekano.

¹⁰ Omudi gu’uuhineji aushe oguo uuharu ueriko. Jamue mba je u ihecera, oja puka mehiteero, j’imonica omeehamo ogendji

¹¹ Ndere ngueje muntu gua Karunga, za ko kiinima mbika nondapo. Kembadara u koke muujuki, metirokarunga mehiteero, mohore, mehididimiko no mengungumano.

¹² Kondja ekondjo ehanaua rjehiteero, akana omuenjo guarushe ngu u’icanenua morua ngu ua popja ehepururo ehanaua miipaci jeentari odindji.

¹³ Ngaje andi ku rombuere kotshipara tsha Karunga, ngu ta pe iinima ajishe omuenjo guajo, no kotshipara tsha Kristus Jesus, ngu a popja ehepururo ehanaua kotshipara tsha Pontius Pilatus.

¹⁴ Diginina otshipango, ngueje ku nokapogodidi, ku nondjo sigo okejo rja Muene guetu Jesus Kristus,

¹⁵ ndi ari ka cikicua kecimbo rj’uka komunerago, komupangeri ohiike, omukuaniirua guaakuaaniirua, h’Omuene guoojene.

¹⁶ Ohiike ke na eso, e ri muujerere, kamu vuru oku ha mo, ina monika komuntu, h’ita vuru okumonika, esimaneko nepangero rjarushe nari kare pu he Amen.

¹⁷ Rombuera aajamba jomuujuni mbuka, jo kaa hor’uuntsa, kaa hiture muujamba mbu itau vuru okuinekerua, aaue, omu Karunga omunamuenjo, ngu te tu pe iiparuca ojindji.

¹⁸ Ja ronge uuhanaua, ja ninge aajamba miironga iihanaua, ja gandje ja topore nenjanju meriko rjauo.

¹⁹ Jo j’igongere otshingi eriko ndi ari ningi omukanka gua mbjoka jokomesho, opo j’akane omuenjo guotshiri.

²⁰ Timoteus, pungura otshaanaua tsha gandjua kungueje, ikerera ejejagano ehineji nomarudi guunkurungu, mbu au tiua etshiuo, ndere jo iirombo.

²¹ Jamue oj’iteera eehapu doka, no ja piramene ehiteero. Oshenda nahi kare nangueje Amen.