1 Timoteus 5 - Etestemente Epe ✠ 1951

ONTOPORUA 5. Eemkaro daapangeri jegongaro

¹ Ino ganda neji omusamane. Popja na he ongashi ku sho. Aarumentu aanjasha ongashi kaamuanjoko.

² Aakiintu mba ja kurupa ngashi ku njoko, aakiintu aanjasha ngashi kaamuanjoko muushekesheke aushe.

³ Simaneka aaserekadi, okutja aaserekadi jotshiri.

⁴ Ndere omuserekadi nge oku nojana nenge aatekuru, n’ironge okupangera ondjugo he, opo aakuruntu ja garurirue. Shoka tsha pandikua ku Karunga.

⁵ Omuserekadi guotshiri, ngu a cigua po, n’inekere Karunga, a diginine momagarikano no momiindiro omutenja nuusiku.

⁶ Ndere ngu e neemkaro dokuiteera uuhineji, okua sa nanto e nomuenjo.

⁷ Iinima ja tja ngiino ji ja rombuera neenkondo, jo kaa geerue.

⁸ Ndere nge ku na gumue ita sire aangandje ndere unene aanegumbo otshisho, he e ja kuace, oku’idimbika ehiteero rje, e vure ngu ke nehiteero muuhineji.

⁹ Mongundu haaserekadi namu tuumbue ike ngu a ninga eemvo eemrongo kanekamue, ngu a ri omukiintu guomurumentu gumue.

¹⁰ Ngu ta popiua moru’iironga je iihanaua, ngu a putuda ojana, oku’edirira aakuiirongo, a kosha eempadi daajapuki, a kuaca mba ja ri momacinaneko, he a diginina iironga iihanaua ajishe.

¹¹ Aaserekadi aanjasha ino ja tuumba. Oshoka nge ja kuatua kuuharu, ja kenjanana uukarere ua Kristus, oja ara okuokanua.

¹² Otaa k’imonica epanguro oshoka oja teja eganeno rjauo rjotango.

¹³ Otsho taa higirire okuendagura nomagumbo, je nuunje, nde kau shi uunje ike, haa jejagana nuutaredi, haa popi doka inadi opara.

¹⁴ Otsho nda arere aaserekadi aanjasha j’okanue, ja ronge iironga jauo megumbo, kaa pe omunandumbo ompito hokutsheka.

¹⁵ Jamue oja pjampjana nokuri, ja gama komusatana.

¹⁶ Omuhiteeri ngu e naaserekadi ne ja kuace, egongaro kari mone uupjakadi, rjo ri vure okukuaca aaserekadi jotshiri.

¹⁷ Aapristeri aadiginini ja simanekue unene. Unene mboka je nerama mokuuvica no mokuronga.

¹⁸ Oshoka obibeli ohahi ti: “Ino manga okana kuondumetana nge tahi shu.” Ho ahi ti uo: “Omurongi na peue ondjambi he.”

¹⁹ Ku mbo taa popo omupristeri ino pupa ko, shira opeentari mbari nenge ndatu.

²⁰ Mba ja jona ja geera miipaci ja ajeshe, jo jakuauo ja tire uo.

²¹ Andi ku ganica ku Karunga no ku Kristus Jesus no kaajengeli aahogororua, ngueje u guanice iinima mbika, ino rimbirirua. Ino ronga tsha ngueje to joorora aantu.

²² Ino enderera pokutenteka gumue omake, ngueje ku kare u nondjo muurunde ua jarue. Ngueje muene kara nomutima gua jera.

²³ Ino nua ue omeja ike, nua uo omavinju omatshona moru’era rjohe no moru’omavu gohe ogendji.

²⁴ Uurunde uaantu jamue ou tshiuike, no ua tetekera kepanguro. Pu jamue tau ja randura.

²⁵ Niironga iihanaua oji tshiuike. Nge katshi ri ngii, itaji vuru okukara arushe mehoramo.