1 Timoteus 3 - Etestemente Epe ✠ 1951

ONTOPORUA 3. Omajakuro geklesia

¹ Ohapu ndjika oho otshiri: Ngu a hara ejakuro rjuuepiskopi, okua ara ejakuro ehanaua.

² Ndere omuepiskopi oku nokumonikua ke nokapogodidi, a hokana rumuike, omuidiriki, omunandunge, ke shi omugejentu, omunamukaro omuhanaua omujakuri guaahenda, h’onkurungu mokuronga.

³ Ngu ke shi onkorue, ke ore omadengacano, aaue, omunambiri, ke ore eentamanana, ka kare nomukona.

⁴ Oku nokupangera naua ondjugo he nokuputuda aanona mevuriko no muujapuki aushe.

⁵ Ndere ngu ke tshi kupangera ondjugo he muene, ota vuru ngiini okurera eklesia rja Karunga?

⁶ Ka kare ngoka a tshatshua ngashingika, ka kuatue kuuntsa nde ta guire mepangero rjomusatana.

⁷ Ndere mba je ri pondje oje noku mu popja naua, ka adikue komatsheko nde ta guire momuigo guomusatana.

⁸ Naadiakoni uo oje nokukara neemkaro eemhanaua, neehapu di adi vuru okuinekerua, kaa kare nuukorue, nokukonga eriko rjuumbudi.

⁹ Oje nokupungura otshoorekua tshehiteero mehuvo rja jera rjomutima.

¹⁰ Ndere oje nokupurapurua tango. Ja ronge iironga jauo, nge je ri naua.

¹¹ Otsho uo aakiintu je nokukara neemkaro eemhanaua, kaje shi aarundiri, aaue, aahidiriki, aadiginini miinima ajishe.

¹² Omudiakoni keshe na kare a hokana rumue, a pangere naua aanona nondjugo he.

¹³ Oshoka mboka haa rere naua ejakuro rjauo, otaa k’irongera esimano enene, nehinekero enene mehiteero rjokuiteera Kristus Jesus.

¹⁴ Doka andi di ku tshangere metegerero rjokuja kungueje masiku.

¹⁵ Ndere nge t’imbiua ko tsha manka, ngueje u tshiue eemkaro domondjugo ha Karunga, ho eklesia rja Karunga omunamuenjo, rjo ongudi nomukanka guotshiri.

¹⁶ Otsha tshiuika, otshoorekua tsherago rjomu Karunga otshinenerera: otsh’ororua monjama, tsh’ucua kutja otsh’uka m’Ombepo, tsha tarua kaajengeli, tsh’uvicirua aapagani, tsh’iteerua muujuni, tsha tuumbua mehadimo.