1 Timoteus 1 - Etestemente Epe ✠ 1951

ONTOPORUA 1. Kumagida aarongi jiirombo

¹ Paulus, omuapostoli gua Jesus Kristus keharo rja Karunga, h’omuhupici guetu, no rja Jesus Kristus, h’etegerero rjetu.

² Ku Timoteus omumuandje omuhorike mehiteero oshenda nesiroshenda nombiri ha Karunga Tate no ha Kristus Jesus Muene guetu.

³ Ngashi nde ku indira nare, ngija nda hire ku Makedonia, ngueje u kare mu Efesus, ngueje kumagida jamue neenkondo, kaa ronge ue omarongo garue,

⁴ kaa kare ue ja kuatakana neengano nomajaruro gokujarura momazimo eevaro kadi neshuriro. Iinima mbika otaji monica aantu omarudi gouara. Itaji kokica ehiteero mu Karunga.

⁵ Ecikiro rjehuvico orjo ohore hahi zi momutima gua jera, ehuvo ehanaua rjomutima, nehiteero kari nekojuko.

⁶ Jamue oja kanica iinima mbika, j’iteera uujejagano ouara.

⁷ Oja arere kutarua ng’aarongi jompango. Ndere kaa huva ko shoka taa popi jojene, na shoka haa huvica neenkondo.

⁸ Ompango ombuanaua, nge tapu dimbururua naua enongero rjaho.

⁹ Omu nokudimburukua naua nokutja ompango inahi gandjerua aajuki, aaue, oha gandjua morua mboka kaa nuujuki, aashumi, mba haa dini Karunga, aarunde, mba je neemkaro eemhineji, ja nigirikua kuuhineji, aadipagi ja she no ja hina, jo aadipagi ja jarue.

¹⁰ Moru’aahonderi, naarari nomatshenge, aajeki jaantu, aaniirombo, na mboka haa gana iirombo niinima ajishe mbi inaji oparacana nerongo rj’uka,

¹¹ ndi ari oparere evangelium rjehadimo rja Karunga omunerago, ndi nda peua kehuvico.

¹² Onda pandura nguka a korekandje, Omuene guetu Jesus Kristus ngu a tarandje omudiginini nokua turandje mejakuro ndika,

¹³ nanto ngaje nda ri nare omutsheki, omutidatidi, ngaje omunjani. Ndere onda mona esiroshenda rja Karunga, oshoka onde tshi ninga ngaje nda ri kandi netshiuo, kandi nehiteero.

¹⁴ Onda peua ehudo rjoshenda ha Muene guetu nehiteero nohore mu Kristus Jesus.

¹⁵ Ohapu ohi notshiri, ho h’opara h’iteerue nokutja Jesus Kristus okue ja muujuni uetu, he a hupice aarunde. Mokati kauo ngaje omutango.

¹⁶ Otsho ngaje onda sirua oshenda, Kristus Jesus a horore mu ngaje omutango etaronteni rje arishe, kerongo ku ajeshe nokutja mba je mu iteera taa mono omuenjo guarushe.

¹⁷ Ohe omukuaniirua guarushe, ngu ke neshuriro, ka monika, Karunga ohiike, he na simanekue, na ambererue arusherushe Amen.

¹⁸ Otshipango shika mumuandje Timoteus, andi tshi tura momutima guohe, ngashi tsh’oparera uo omashunganeko nga ua shunganekerua, ngueje u kondje ekondjo ehanaua.

¹⁹ Ngueje u kare nehiteero, nehuvo ehanaua rjomutima, rja kanicua ku jamue, mba j’iteka ehiteero.

²⁰ Mokati kauo omu na uo Himeneus na Aleksander. Onde ja gandja komusatana, jo ja rongue okueca omatsheko.