1 Petrus 4 - Etestemente Epe ✠ 1951

ONTOPORUA 4. Ondjira hotshikriste.

¹ Ano Kristus sho a hehama monjama, na ne uo ikorekeni nomadiradiro ga tja ngaaka, oshoka ngoka t’ehama monjama ota zimbuka okujona.

² Opo a huharere erara rja upa ndi rjomonjama, ha kuuharu uaantu, aaue, okeharo rja Karunga.

³ Otsha guana nduno sho ja guanica merara ndi rja pita rjomeendjenda dauo eharo rjaapagani, mba j’ihecera uuharu uuhineji, oruhondero, uukorue, erumbo, iituci jokunua nomasimaneko omiineji giimenka.

⁴ Oja rurirua sho itamu kara puamue na jo mokumatukira kenono ndi rjuurunde aushe. Otsho tshe mu tshekica.

⁵ Ndere oje nokuihokorora ku ngu ta cikama po a pangure aanamuenjo naasi.

⁶ Otsho uo aasi j’uvicirua evangelium, opo nanto panjama taa pangurua ng’aantu, pambepo ja kare nomuenjo meenkondo da Karunga.

⁷ Eshuriro rjinima ajishe ori ri popepi. Kareni ano aanandunge, garikaneni nuudiginini.

⁸ Ndere unene oracaneni arushe, oshoka ohore ohahi siikire omajonaguro ogendji.

⁹ Jakuracaneni ng’aahenda, kamu negongotoro.

¹⁰ Rongeracaneni keshe gumue nomagano e ga peua ng’aajakuri aahanaua joshenda ohindji hiiri no hiiri ha Karunga.

¹¹ Ngu ha uvica, n’uvice ohapu ha Karunga. Nge e nejakuro, na jakure meenkondo te di peua ku Karunga, opo Karunga a simanekue mu ajishe morua Jesus Kristus, ngu e nesimano nepangero arushe sigo arushe Amen.

¹² Jahorike, emakero ndika rjomuriro, amu adikirua ku rjo ne mu makerue, inamu ri ruririrua ng’otshinima inatshi uvika manka.

¹³ Aaue, njanjukueni sho tamu ehamekua puamue na Kristus ne mu njanjukue uo nokurigora pehoroko rjehadimo rje.

¹⁴ Ne aanerago nge amu tshekerua edina rja Kristus, oshoka nena esimano nehadimo neenkondo da Karunga n’Ombepo he otahi mu nambere.

¹⁵ Kapu kare gumue mokati keni t’epekua he omudipagi, omufuci, omutsheki omuaaruki gueriko rjaantu.

¹⁶ Ndere nge t’epekua oshoka ohe omukriste, ina soshoni, aaue, na amberere Karunga medina ndi.

¹⁷ Ecimbo rja cikana, epanguro ri shimbike mondjugo ha Karunga. Ndere nge ari shimbike tango pu sse, nena otari ka shurira ngiini pu mbejaka inaa hiteera evangelium rja Karunga?

¹⁸ Omujuki nge t’upicua konjara, nena ngoka ke na Karunga, omurunde ota kara peni?

¹⁹ Ano na mboka taa hepekua keharo rja Karunga naa gandje eemuenjo dauo komutshiti omudiginini niironga iihanaua.