1 Petrus 3 - Etestemente Epe ✠ 1951

ONTOPORUA 3. Eemkaro diiri no diiri.

¹ Otsho uo aakiintu naa vurike kaarumentu jauo, opo mboka inaa hiteera ohapu, ja ninge aahiteeri moru’eemkaro daakiintu, nanto ohapu kahi po,

² nge haa tara eendjenda deni domuushekesheke no mokutira Karunga.

³ Uurenga uauo kau kare mbuka uokombanda, mbu uomomapando gomafufu uomeenjemba dotshingoldi no meenguuo doparerera.

⁴ Aaue, ombuka uomomuntu guomeni, momuenjo guombiri no guengungumano rjarushe, ngu tagu pandikua unene ku Karunga.

⁵ Otsho nare aakiintu aajapuki j’ihopeka mba ja tegerera Karunga nde ja vurika kaarumentu jauo.

⁶ Otsho Sara a vurika ku Abraham, nde te mu ruku “Muene”. Ne aana je aakadona, nge amu rongo uuhanaua, ne itamu idinica muudigu.

⁷ Nane uo jarumentu, kareni neendunge mokukara kueni naakuiintu onga mbo inaa korerera. Ja simanekeni, oshoka na mboka aacigururi joshenda homuenjo, ne kamu imbiue ko tsha momagarikano geni.

⁸ Tshi romborua: Kareni arushe mu nombiri, nokusiracana oshenda, nokuoracana ng’aamuahina, mu kare nondjeerera, nengungumano no nehitshonopeko . . .

⁹ Inamu tshuniciracana uuhineji na mukueni. Inamu tuka nge mua tukua, aaue, jambekacaneni. Otsho tshe mu icanica ne mu cigurure ejambeko.

¹⁰ Oshoka keshe ngu a hara okunjanjukirua omuenjo gue nokumona omasiku omaanaua, na kerere eraka rje kuuhineji, eemrungu de kadi popje iirombo.

¹¹ Na piramene kuuhineji, ta rongo uuhanaua. Na konge ombiri noku hi kongerera.

¹² Oshoka omesho ga Muene oga tarera kaajuki, omakutsi ge tag’uvu egarikano rjauo. Ndere otshipara tsha Muene otshi nondumbo na mboka taa rongo uuhineji.

¹³ Ore ta vuru oku mu monic’iishuna, nge amu kembadara okuronga uuhanaua?

¹⁴ Na nge amu epekerua uujuki, ne aanerago. Inamu tira omatirico, ne inamu rimbirirua.

¹⁵ Japureni ouara Kristus Muene meemuenjo deni, ne mu kare arushe mu’irongekida okujamukura keshe ngu te mu pura etegerero rjeni.

¹⁶ Ndere tshi ningeni nengungumano no metirokarunga, nde kareni nehuvo ehanaua rjomutima, opo mboka je mu tsheka moru’eendjenda deni eembuanaua mu Kristus, ja gugicue nomarundiro gauo.

¹⁷ Okueepekerua iironga iihanaua, Karunga nge e tshi ara, shuepo, oku vure okueepekerua iironga iihineji.

¹⁸ Otsho na Kristus okua sir’eendjo rumue, he omujuki moru’aarunde, opo e tu fare ku Karunga. Panjama okua dipagua, ndere pambepo okua turua omuenjo.

¹⁹ Mu ho okua hi uo keembepo da ri mondrongo nokue di uvica.

²⁰ Mboka ja ri inaa hiteera momasiku ga Noe, sho j’inekera ouara onteni ha Karunga, etembameja sho rja tungua. Aatshona, eemuenjo uunutatu d’upicua komeja.

²¹ Otsho etshatsho ari mu upica uo nena. Rjo kari shi ekoshopo rjonjata horutu, aaue, ehindiro rjokuindira Karunga ehuvo ehanaua rjomutima moru’ejumuko rja Jesus Kristus

²² Ngoka e ri korurjo rua Karunga, sho a sindi eso, sse tu ninge aacigururi jomuenjo guarushe. Okua ronda keguru nokupangera aajengeli, aanampangero naanankondo.