1 Petrus 2 - Etestemente Epe ✠ 1951

ONTOPORUA 2. Omakumagido.

¹ Eceni ano onjanja ahishe, omatshendjereko, ekojuuko, okasheshe nomarundiro ageshe.

² Ng’uunona uutshutshuka kareni mu are omashini gopambepo, go gotshiri, ge mu kokice, ne mu upicue.

³ Ne mua makera nokuri uutoue uomu Muene.

⁴ Engeneni ku he, kemanja ndi ri nomuenjo, rj’ekeruashi kaantu, rj’ogororua ku Karunga no rja simanekua.

⁵ Itungireni mu he ng’omamanja ge nomuenjo, mu ninge ondjugo hopambepo, uupristeri uujapuki, opo mu pe Karunga omagano gopambepo, ga pandikua ku Karunga morua Jesus Kristus.

⁶ Otsho tsha tshangua moramata: “Tara andi dikire mu Sion emanja rjopotshikororo, rj’ogororua naua, rj’oparerera. Ngu e ri iteera, ita shundurua.”

⁷ Ne sho mu’iteera, otari mu monica esimano. Ndere pu mboka inaa hiteera, rjo orjo “emanja rj’ekeruashi kaatungi, nde rja ningi emanja rjopotshikororo.”

⁸ Emanja rjokuipuma, emanja rjepunduko pu mbo je nondumbo nohapu, itaa hi iteere, nanto j’ucirua uo ku ho.

⁹ Ndere ne ezimo rj’ogororua, one aapristeri naakuaniirua, otshiguana otshijapuki, naantu je muene, ne mu uvice eenkondo da ngoka e mu kuca meemrema noku mu icana kuujerere ue u’oparerera.

¹⁰ Nare kamua ri otshiguana, nde nena mua ningi otshiguana tsha Karunga. Omua ri inamu sirua oshenda. Nena omua sirua oshenda.

¹¹ Jahorike, andi mu indire ng’aakuiirongo aahendi. Idirikeni uuharu uopanjama mbu hau kondjica omuenjo.

¹² Kareni neendjenda daajuki mokati kaapagani, opo jo mba je mu rundira, nokutja ne aarunde anuua, ja tare iironga jeni iihanaua, jo ja amberere Karunga mesiku rjehicano rjauo.

¹³ Moru’eharo rja Karunga vurikeni kaantu, komukuaniirua, ngu e vure ajeshe,

¹⁴ nenge komarenga ga tumua ku he, okugeera aajonaguri noku pa aajuki ondjambi.

¹⁵ Oshoka eharo rja Karunga orjo ndi ne mu mueneke uugoua uaantu aacece nokuronga uuhanaua.

¹⁶ Ne aamangururua. Ndere emangururo rjeni kari ninge otshisiikiro tshuurude, aaue, kareni aapija ja Karunga.

¹⁷ Simanekeni ajeshe, horeni aamuanjoko, tireni Karunga, simanekeni omukuaniirua.

¹⁸ Japija ne, vurikeni koojene jeni noku ja simaneka, kaku shi ku mboka aahanaua ike, je nombiri, aaue, no ku mboka kaa nombiri.

¹⁹ Shoka atshi eta oshenda ha Karunga nge ku na gumue t’umbata uudigu mbu a ningirua ouara moru’eharo rjokuoparera Karunga.

²⁰ Oshoka opu nesimano rjatshee nge omu nehididimiko momageero nga mba mua ningirua komajonaguro geni. Ndere nge omu nehididimiko momeepeko nanto mua rong’uuhanaua, nena amu mon’oshenda ha Karunga.

²¹ Otsho mua icanenua shi, oshoka Kristus okue tu epekerua uo nokue mu cigire otshoorerua ne mu rambe eemapdi de.

²² He ina ninga ondjo. Mokana ke inamu monikua iirombo.

²³ He ina tuka sho a tukua, ina geja sho a hepekua, aaue, oku’ihecera ku ngu e mu pangura neji.

²⁴ He muene oku’umbata eendjo detu porutu rue komutshigakano, opo uurunde u se mu sse, sse tu kare nomuenjo muujuki. Omu’erukicua kiiraro je.

²⁵ Oshoka omua ri mua fa eenzi da kana. Ndere ngashingika omua garurua komusita komukuriri gueemuenjo deni.