1 Petrus 1 - Etestemente Epe ✠ 1951

ONTOPORUA 1. Eemkaro daakriste.

¹ Petrus, omuapostoli gua Jesus Kristus, kaakuiirongo aahogororua mba ja sharakana mu Pontus, Galatia, Kapadokia, Asia na Bitinia.

² Mba j’ogororua kejapuro rjok’Ombepo, kevuriko, ketshatshimino nombinzi ha Jesus Kristus, ngashi Karunga She e ja ti nare. Oshenda nombiri ohindji ku ne!

³ Na simanekue Karunga, na She ha Muene guetu Jesus Kristus, ngu e tu varurura moru’esiroshenda rje enene, mejumuko rja Jesus Kristus kuusi, ketegerero ri nomuenjo,

⁴ kuuciga mbu itau shuru po, inau njata, itau ganja, mbu mua pungurirua meguru.

⁵ Neenkondo da Karunga ne tamu gamenua kehiteero, mu mone ehupico, ndi ari k’ororua merara rja shugunina.

⁶ Ne tamu ka njanjukua, nanto ngashingika, nge atshi mu oparere, tamu nik’uupongo okarara okatshona komamakero giiri no giiri.

⁷ Opo ehiteero rjeni ndi rja makerua, ri monikue ri vure meendjere otshingoldi tsha jerekua momuriro, kehamberero no kerigoro no kesimano pehoroko rja Jesus Kristus.

⁸ Ngoka omu mu ore, nanto inamu mu mona. Omue mu iteera, nanto kamu mu uete ngashingika. Noku mu iteera ngashingika, ne tamu ke mu njanjukirua enjanju kari tshi kuokororua, ndi rja adimicua,

⁹ nge mua ada ecikiro rjehiteero rjeni, okutja ehupico rjeemuenjo.

¹⁰ Aaprofeti mba ja shunganeka oshenda ndji mua peua, oja konga jo ja konakona ehupico ndioka.

¹¹ Oja konakona nokutja erara orini, rjo ri ri ngiini, ndi Ombepo ha Kristus ho mu jo ahi popi, sho ahi shunganeke omeepeko ga Kristus nehadimo ndi ari randura ko.

¹² Oj’ororerua nokutja inaa hijakura jo jene, aaue, ne oje mu jakura na mbika atshi uvicua ngashingika kaahuvici jevangelium meenkondo da Karunga Ombepo Ondjapuki, ndji ha tumua ha zi keguru, ndji aajengeli ja jeerukua okuondamena mo.

¹³ Ano mangeni eembuetero domuenjo gueni, kareni mu’idirika, ne mu tsike etegerero rjeni arishe moshenda ndji amu ka peua pehoroko rja Jesus Kristus.

¹⁴ Ne mu fe aanona aavuriki, kamu iteere ue uuharu ueni ngashi nare ngija mua ri kamu netshiuo.

¹⁵ Aaue, kareni aajapuki meendjenda deni adishe, ngashi he omujapuki ngu e mu icana.

¹⁶ Otsha tshangua: “Kareni aajapuki oshoka nangaje omujapuki.”

¹⁷ Ndere sho amu icana nga sho ngoka ta pangura keshe kiironga je, ha kotshipara tshe, okuenda kueni oku kare metiro ecimbo arishe ndi mu ri po.

¹⁸ Omu tshi tshi nokutja inamu kurirua kokukara kueni okuuhineji, hu mua cigurura koosho notshingoldi no notshisilveri atshi shuru po,

¹⁹ aaue, onombinzi ha Kristus hi nondjere onene, ohe onzigona kahi nokapogodidi, nenge otshiponga.

²⁰ A za a hogororua nokuri ngija uujuni inau tshitua, he t’oroka morueni peshuriro rjomacimbo.

²¹ Omorue ne omu’iteera Karunga, ngu e mu jumuda kuusi, nokue mu pa ehadimo. Otsho ehiteero rjeni netegerero rjeni ri kare rja tsikua mu Karunga.

²² Kosheni eemuenjo deni mevuriko rjohore, mohore haamuahina. Oracaneni tshiri nomutima kagu nekojuuko.

²³ Ne omua varururua ha kombuto ahi shuru po, aaue, oku ndjika itahi shuru po, okutja okohapu ha Karunga omunamuenjo, ngu ta kara po arusherushe.

²⁴ “Oshoka onjama ahishe oha f’omuiidi, ehadimo rjaho orja f’ontsheno homuiidi. Omuiidi otagu ganja, ontsheno haguo tahi jagumuka.

²⁵ Ndere ohapu ha Muene ahi kara sigo osigo.” Ohapu ndji amu uvicirua mevangelium.