1 Kaakorinti 9 - Etestemente Epe ✠ 1951

ONTOPORUA 9. Omuapostoli ota kongo ike ehupico rjeemuenjo daantu

¹ Ngaje kandi na nani epitiko arishe? Kandi shi nani omuapostoli? Inandi mona nani Jesus Kristus Muene guetu? Ne kamu shi otshironga tshandje mu Muene?

² Nge kandi shi omuapostoli miipaci ja jarue, ngaje ogueni tshiri. Ne jene edimburuco rjejakuro rjandje rjuuapostoli mu Muene.

³ Otsho tandi tompora ajeshe mba taa purandje iishuna.

⁴ Nenge sse katu na epitiko rjokutuumba iikurja nokunua?

⁵ Katu na epitiko sse tu cindikirue komukiintu omumuameme ngashi aapostoli jakuauo naamuahina ja Muene, na Kefas?

⁶ Nenge sse na Barnabas ike katu nepitiko rjoku tshi ninga?

⁷ Ore ta hi kiita, h’ita futua? Ore ta ningi epja rjomavinju, h’ita ri iihimati jago? Ore ta rica iimuna, it’iparuca nomashini giimuna?

⁸ Andi popi ouara shoka tsh’uka paantu, nenge itatshi popiua uo mompango?

⁹ Otsha tshangua mompango ha Moses: “Ino manga okana kondumetana nge tahi shu.” Karunga ota sire eendumetana otshisho?

¹⁰ Nenge ota popi doka unene moruetu? Eno otsha tshangua moruetu. Metegerero rjokutegerera iihimati omupururi ha purura, h’omuntu ha shu.

¹¹ Nge tua kuna pune ombuto hopambepo, nena nduno otshinima otshinene nani, nge atu ka teja pune iinima joparutu?

¹² Jarue nge je nepitiko ndika pune, otshike nduno ha sse? Ndere inatu konga oruporo ruetu mepitiko ndika, sse otua ninga atshishe sse jene, evangelium rja Kristus kari imbiue.

¹³ Kamu tshi nokutja mboka haa rongo motempeli, ohaa parucua uo niinima jomotempeli? Na mboka haa karere ohaltari, ohaa peua uo otshitoporua tshauo kohaltari.

¹⁴ Otsho uo Muene a gandja otshipango nokutja ajeshe mba haa huvica evangelium, ja parucue uo kevangelium.

¹⁵ Miinima mbi ajishe inandi mu ningica koruporo ruandje. Otsho inandi tshanga iinima mbino opo komesho tshi ningue ngaano nangaje. Aaue, sigo okusa inandi ara ndi kucue esimano rjandje.

¹⁶ Okuuvica evangelum katshi shi esimano rjandje, aaue, otshipango tshandje Jaje ngaje nge kandi uvica evangelium.

¹⁷ Nge tandi tshi ningi keharo rjandje, ngaje ondi na ondjambi handje. Nde nge tii tshi ningi neciminiko, nena otsha ningi ejakuro rjandje.

¹⁸ Ondjambi handje otahi zi peni ano? Omehuvico rjevangelium ngaje kandi tuumba tsha, ngaje kandi noruporo ruepitiko ndi rja zi mehuvico rjevangelium.

¹⁹ Nanto ngaje kanda ri nda ciminikua okurongera ngu nenge nguija, ngaje ond’iningi omupija gua keshe gumue, opo ndi rikore ojendji.

²⁰ Mokati kaajuda okua nda f’omujuda, ndi rikore aajuda.

²¹ Mokati ka mboka je ri koshi hompango, nda fa ngu e ri koshi hompango, nanto kandi ri koshi hompango, opo ndi rikore mboka je ri koshi hampango. Mokati ka mboka kaa nompango, ngaje nda fa ngu ke nompango, nanto ngaje kandi shi ngu ke nompango, aaue, ondi ri koshi hompango ha Kristus, opo ndi rikore mboka kaa nompango.

²² Paankundi nda f’omunkundi, ndi rikore aankundi. Ngaje nda ningire atshishe ku ajeshe, opo ndi upice ajeshe.

²³ Atshishe andi tshi ningi moru’evangelium, ndi mone otshitoporua tshandje murjo.

²⁴ Kamu tshi nokutja mboka haa matuka mondjira hecigacano po, ajeshe ohaa matuka, nde gumuike ta akana ondjambi hesindano? Otsho uo ngaa matukeni, ne mu hi akane.

²⁵ Keshe ngu t’irongekidire ematuko rjokucigacana, oh’idirike miinima ajishe. Jo ohaa tshi ningi, ja peue ondjambi ndji ahi shuru po. Nde sse atu tshi ningi tu rikore ondjambi ndji kahi shura po.

²⁶ Otsho nangaje andi matuka, ndere ite matuka uusama. Ote kondjo, ndere ite denge ombepo, aaue.

²⁷ Andi denge orutu ruandje noku ru tura mepangero rjandje, ngaje muene kandi shundurue, nanto nd’uvica jarue.