1 Kaakorinti 8 - Etestemente Epe ✠ 1951

ONTOPORUA 8. Onjama hoshura

¹ Okupopja onjama hoshura, sse otu tshi tshi, oshoka sse atushe otu neendunge domiinima mbi ajishe. Ndere eendunge otadi gandja ontsinu, ohore tahi koreke muuhanaua.

² Ngu t’inomo omunandunge, ke tshi tshi nanena okutshiua kue nokutja oku nokukara ngiini.

³ Ndere ngoka e hore Karunga, he oku tshiuike ku Karunga.

⁴ Okupopja ano iikurja mbi taji gandjua kiikarunga, sse otu tshi tshi nokutja kapu notshikarunga muujuni, kapu na karunga karue, ongoka Gumue.

⁵ Tshiri mpo pu na taji rukua iikarunga mbi jomeguru nenge mbi jopevi, ngashi mpo pu niikarunga ojindji noojene ojendji.

⁶ Ndere sse otu na tshiri Karunga gumuike, oTate, ku he haku zi atshishe, sse tue mu tshitirua. Sse tu na Muene gumuike, oJesus Kristus, omorue iinima ajishe ji ri po, nasse uo.

⁷ Ndere ha ajeshe je netshiuo ndika. Jamue inaa rundurura omadiradiro gauo gokudiradira iikarunga, haa ri koshura. Nehuvo rjauo rjomutima, ndi ri nuunkundi, otari njatekua.

⁸ Iikurja kaji notshironga motshipara tsha Karunga. Itatu rikora tsha nge tatu ri. Otsho uo itatu kanica tsha, nge katu rja.

⁹ Ndere kotokeni, emangururo rjeni kari pundukice aankundi.

¹⁰ Nge pu na gumue e uete mukuauo omunandunge ta ri mondjugo hiimenka, nena ehuvo rje rjomutima ndi ri nuunkundi, itari tsuua omukumo nde ta ri uo onjama hoshura?

¹¹ Nena eendunge dohe da pukica omumuanjoko omunkundi ngu a sirua ku Jesus Kristus.

¹² Nge amu jono ngaano kaamuanjoko noku arura ehuvo rjomutima, ne amu jono ku Kristus.

¹³ Ano nge opu niikurja mbi haji pukica omumuameme, inandi ara okurja onjama sigo osigo, kandi pukice mumuameme.