1 Kaakorinti 7 - Etestemente Epe ✠ 1951

ONTOPORUA 7. Ehokano rjaakriste nuuhanaua uomukaro gua mboka inaa hokana morua Karunga

¹ Ku doka mua tshangerandje, ngaje ndi tshi nokutja otsh’oparera omurumentu, nge ke na omukiintu.

² Ndere okutshirika omaruhondero, omurumentu keshe na kare nomukiintu gue muene, nomukiintu keshe na kare nomurumentu gue muene.

³ Omurumentu na pe omukiintu shoka e noku mu pa, otsho uo omkiintu omurumentu gue.

⁴ Omukiintu ke nehipangero morutu rue, omurumentu ohe tuu. Otsho uo omurumentu ke nehipangero morutu rue, omukiintu ohe tuu.

⁵ Inamu idirikacana. Nge amu tshi ningi, okacimbo okatshona kouara nokuiteeracana kueni, ne mu igandjere omagarikano. Okuza mpoka ne amu kara puamue itshee, kamu makerue komusatana, sho mua njengua okuidirikacana.

⁶ Ndere shoka katshi shi otshipango, aaue, epitiko.

⁷ Onda ara unene amushe mu fendje. Ndere keshe gumue okua peua ku Karunga omagano ge muene, ngaka nenge ngejaka.

⁸ Andi rombuere mboka inaa hokanua naaserekadi, nokutja otshe j’oparere, nge taa kara nga ngaje.

⁹ Ndere okuidirika nge kue ja njenga, jo naa hokanue, oshoka okuokanua shuepo, ku vure okurunguna muuharu.

¹⁰ Mboka ja guanekua mehokano, hangaje aaue, Muene ote ja rombuere nokutja omukiintu ina topoka nomurumentu gue.

¹¹ Ndere nge a topoka na kare ina okanua. Nenge na ninge itsheue ombiri nomurumentu gue. Otsho nomurumentu ka tide omukiintu gue.

¹² Mbejaka jarue, ngaje andi ja rombuere, ha Muene, nge opu nomukuetu e nomukiintu ngu ke nehiteero, ka tidue po, nge a panda okukara pu he.

¹³ Otsho uo omukiintu omunehiteero, nge oku nomurumentu ngu ke nehiteero, ha panda okukara puamue na he, ke mu ece.

¹⁴ Oshoka omurumentu ngu ke nehiteero, ota ka japurua komukiintu omuhiteeri. Nomukiintu ngu ke nehiteero, ota ka japurua komurumentu omuhiteeri. Ngeno okua katshi ri ngaano, ando aanona jeni ja kara inaa jera. Ndere jo aajapuki.

¹⁵ Ndere ngoka ke nehiteero, nge a hara okutopoka, na topoke, oshoka nena omukuetu omurumentu nenge omukuetu omukiintu ina mangua ue. Karunga okue tu icana kombiri.

¹⁶ Ngueje mukiintu, ou tshi tshi ngiini nokutja t’upica omurumentu? Ngueje murumentu ou tshi tshi ngiini, kutja t’upica omukiintu?

¹⁷ Keshe gumue na kare mondjira ndji a peua ku Muene, mu a hicanua ku Karunga. Otsho andi rongo momagongaro ageshe.

¹⁸ Ngu a hicanua a fukarekua nare, ka kembadare a fe ngu ina fukarekua. Ngu a hicanua ina fukarekua nare, ka konge efukareko.

¹⁹ Efukareko kari notshironga, nokukara ina fukarekua kaku notshironga, aaue, eguanico rjiipango ja Karunga.

²⁰ Keshe na kare mondjira moka a hadikua ngija a hicanua.

²¹ Nge oua ri omupika sho u’icanua, kapu nambudi. Ndere nge opu nompito hokuimangurura, tuumba oruporo ruohe ruompito ndjo.

²² Oshoka ngoka a hicanenua mu Muene, a ri omupika, ohe omumangururua gua Muene. Otsho uo keshe a hicanua a ri omumangururua, omupija gua Kristus.

²³ Ne omua randua neendjere eedigu. Ano inamu ninga aapika jaantu.

²⁴ Jamuameme, keshe na kare mondjira ndjoka pu Karunga mo a hadikua.

²⁵ Sho tsh’ukira aakadona, ngaje inandi peua ku Muene otshipango. Ndere ngaje nga ngu te vuru okuinekerua moru’oshenda ha Muene, onda ara ndi mu pe omeere.

²⁶ Ondi tshi shoka tshi ri naua moru’omaciminiko nga tage ja, ngashi tsh’oparera omuntu keshe okukara ngaano.

²⁷ Nge ua mangerekua nomukiintu, ino kembadara u mangururue. Ndere nge ua manguruka komukiintu, ino konga omukiintu.

²⁸ Nge t’okana, ito ningi ondjo. Omukadona nge t’okanua, ita ningi ondjo. Ndere mboka otaa ka mon’uudigu uopanjama. Ndere onde mu arere ndi mu kerere ku uo.

²⁹ Ndere shoka andi tshi mu rombuere jamuameme: Erara eshupi. Ano mba j’okana, ja fe mba inaa hokana.

³⁰ Mboka taa riri ja fe mbeja itaa riri. Mboka ja njanjukua, ja fe mbeja inaa njanjukua. Mboka taa randa, ja fe mbeja kaje na tsha.

³¹ Mboka je niironga jopajuni mbu, ja fe mbeja kaje na kona tsha niironga mbi, oshoka orupe ru’uujuni mbuka otaru shuru po.

³² Onda arere unene mu kare kamu notshisho. Ngu ke nomukiintu he ta rongere ike shoka tsha Muene, he a pandikue ku Karunga.

³³ Ngu e nomukiintu ota rongere shoka tsh’opajuni nokuoparera omukiintu. Okua topoka meenkembadaro de.

³⁴ Omukiintu ina okanua nomukadona ota kembadara okuoparera Muene, opo a kare omujapuki korutu no komuenjo. Omuhokanua ota sire iinima jopajuuni otshisho, a hoparere omurumentu.

³⁵ Shika andi tshi mu rombuere kuuhanaua ueni, ha ku mu tegera omuigo, ne mu kare neemkaro eemhanaua, kamu imbiue mokugama kueni ku Muene.

³⁶ Nge ku na gumue ha diradira nokutja otshineji ku he, omona omukadona nge a koka ina hokanua, nge tshi nokuningua, na ninge ngashi a hara. Ita jono nge ta okanua.

³⁷ Ngu a korerera momutima gue, ita ciminikua ku tsha, ota vuru okuronga keharo rje muene, nge ta popi ompangere momutima gue, nokutja omona gue omukadona a kare ita okanua. H’oku ri mondjira ombuanaua.

³⁸ Keshe ngoka ano, ta tura omona gue omukadona mehokano, okua ronga naua. Ndere ngoka ite mu tura mehokano, oku mu vure.

³⁹ Omukiintu okua mangua kotshipango manka omurumentu gue e nomuenjo. Ndere omurumentu gue nge a si, h’okua manguruka. Ota vuru okuiteera ehokano ngu a hara. Ndere ne tshi ninge mu Muene.

⁴⁰ Ndere erago rje ori vure ndia, nge ta kara ngashi e ri komeere gandje. Ngaje ndi tshi ondi nombepo ha Karunga.