1 Kaakorinti 6 - Etestemente Epe ✠ 1951

ONTOPORUA 6. Eentamana mokati kaakriste.

¹ Opu na ando gumue mokati keni ita tindi oku ha neentamanana de ku mboka kaa nehiteero, noku ja tokorica, ita hi kaajapuki?

² Kamu tshi tshi nokutja aajapuki otaa ka pangura uujuni? Ndere nduno uujuni nge tau pangurua ku ne, nena ano inamu opara nani okutokora iinima mbi iitshona?

³ Kamu tshi nani nokutja sse atu ka pangura aajengeli? Ano etokoro rjiinima jopevi nari tu njenge ngiini?

⁴ Nge tamu umana moru’iinima jopevi, ne otamu ka tura po aatokori mbo ja dinika megongaro.

⁵ Andi tshi popi kegugico rjeni. Kamu na nani omunandunge mokati keni, ngu ta vuru okutokora mokati kaamuahina?

⁶ Ndere omumuahina t’umana mumuahina miipaci ja mboka kaa nehiteero.

⁷ Eengodi doka domokati keni odo ondjo nokuri. Katshi vure nani okuningirua uuhineji? Katshi vure nani okukengererua?

⁸ Ndere ne jene amu ningi uuhineji nokukengerera uo aamuahina.

⁹ Kamu tshi nani nokutja aakorokoshi kaa mona uuciga uotshirongo tsha Karunga? Mpoka kapu nomarudi: eembuanda, aasimaneki jiimenka, aahonderi.

¹⁰ Omatshenge, naarari jomatshenge, aafuci, aanaruisho, aatsheki, aajeki itaa ka cigurura otshirongo tsha Karunga.

¹¹ Ndere jamue jomokati keni okua ja fa ja tja ngaaka. Ndere nena omua koshua, omua japurua, mua ucirua uujuki medina rja Muene guetu Jesus Kristus no mombepo ha Karunga ketu.

¹² Atshishe otsha pitikua kungaje, ndere inatsh’opara atshishe. Otsha pitikua kungaje atshishe, ndere inandi ara okupangerua ko tsha.

¹³ Iikurja oji ri moru’era. Era ri ri po moru’iikurja. Nde Karunga ote ke ji shanagura narjo. Ndere orutu karu po koruhondero, aaue, okuukarere ua Muene, h’Omuene guorutu.

¹⁴ Ndere Karunga okua jumuda Muene. Nde he te tu jumuda uo meenkondo de.

¹⁵ Kamu tshi nani nokutja omarutu geni ogo iikuarutu ja Kristus? Otatu vuru ano tu kuce iikuarutu ja Kristus, jo ji ninge iikuarutu jombuanda?

¹⁶ Kamu tshi nani nokutja keshe ngu ta kara nombuanda, ota ningi na he orutu rumue? Otsha tiua: Jo mbaka jaari taa ningi onjama himue.

¹⁷ Ndere keshe ngu t’iguaneke na Muene, ohe ombepo himue na he.

¹⁸ Ijagekeni oruhondero! Uurunde keshe mbu omuntu ta ningi, kau ri morutu. Ndere ngu t’ondere, ota jono korutu rue muene.

¹⁹ Nenge kamu tshi nokutja iikuarutu jeni ojo otempeli h’Ombepo Ondjapuki, ndji hi ri mune, ndji mua peua ku Karunga, nde ne kamu shi jeni jene.

²⁰ Ne mua randua neendjere eedigu. Amberereni, umbateni Karunga momarutu geni.