1 Kaakorinti 4 - Etestemente Epe ✠ 1951

ONTOPORUA 4. Uuhineji u’uuntsa

¹ Keshe gumue na dimburure musse aakareri ja Kristus, naajakuri jiihorekua ja Karunga.

² Ndere otsha arika nokutja aajakuri je nokumonikua ng’aantu aadiginini.

³ Ngaje hi na kona tsha nande, nge tandi pangurua ku ne, nenge kepanguro rirue rjaantu, ngaje muene itandi ipangura.

⁴ Tshiri momuenjo guandje kand’uvite tsha. Ndere shoka itatshi pendje uujuki nokuri. Ngu ta ka pangurandje, oMuene.

⁵ Ano inamu pangura, erara nge inari cikana, manka Muene ine ja. Ngu ta fara kuujerere shoka tsh’orama meemrema, nde ta k’orora omaharo geemtima. Uuna tuu ndu keshe gumue ta peua ku Karunga ehamberero rje.

⁶ Shino, jamuameme, otsha tsa pungaje nopu Apollo, ne mu dimburure musse, nokutja kapu kare nand’ogumue t’inenepeke e vure mukuauo nokukonda shoka tsha tshangua, nde ta dini gurue.

⁷ Ngueje u vure mukueni motshee? Ngueje ou na tshee ino tshi peua? Ndere nge ue tshi peua, otshike nduno u’itanga, ua fa ngu ine tshi peua?

⁸ Ne omua kuta nokuri, mua ninga aajamba. Ne mua ningi aapangeri, ha puamue nasse. Ando omua ningire aapangeri, sse uo tu pangere puamue na ne.

⁹ Ondi tshi, sse aapostoli otua turua ku Karunga mokati ka mboka je vurike ku ajeshe, nga mboka ja pangurua okusa. Otua ningi otshitarua miipaci juujuni, jaajengeli no jaantu.

¹⁰ Sse aarai morua Kristus, ne aankurungu mu Kristus. Sse aankundi, ne aanankondo. Ne omua simana, sse tua dinika.

¹¹ Sigo okerara ndika sse tua sondjara, sse tua senota, sse tu nonkai, atu dengua neengonjo, sse katu neshara rjokumenekera.

¹² Otatu rongo, ss’atu ipjakidire nomake getu. Tatu cingua, ss’atu jambeke. Tatu tidatidua, sse atu ididimike.

¹³ Otaje tu njana, sse atu garikana. Sse tua fa tua ninga onkungo huujuni mbuka, ondumba honigi hajeshe sigo okerara ndi.

¹⁴ Inandi tshanga eehapu dika ndi mu gugice, aaue, onda ara ndi mu kumagide ng’aanandunge aahorike.

¹⁵ Ngeno okua mua kara naahongi mu Kristus omajovi omurongo, ando kamu na oosho ojendji, oshoka mu Kristus Jesus ngaje onde mu vara kevangelium.

¹⁶ Andi mu indire ano, kareni aahoreri jandje, ngashi ngaje omuhoreri gua Kristus.

¹⁷ Otsho nde mu tumina Timoteus, omumuandje omuhorike omudiginini mu Muene. Ohe ne mu dimburuce eendjira dandje mu Kristus Jesus, ngashi ngaje andi di rongo apeshe meklesia arishe.

¹⁸ Jamue ja ningi aanantsinu, je tshi nokutja ngaje itandi ke ja.

¹⁹ Ndere andi ja masiku, Muene nge e tshi ara. Nde mesiku ndika ngaje inandi ara okutshiua eehapu daanantsinu mboka, aaue, eenkondo dauo.

²⁰ Oshoka otshirongo tsha Karunga katshi ri meehapu, aaue, omeenkondo.

²¹ Ne omua ara tshee? Nandi je ku ne nongora nenge omohore no momuenjo guengungumano?