1 Kaakorinti 3 - Etestemente Epe ✠ 1951

ONTOPORUA 3. Uuhineji u’iimpaga jomegongaro

¹ Jamuameme, hi vurire okupopja nane ng’aantu jopambepo, aaue, ong’aantu jopanjama, mba inaa toua mu Kristus.

² Onde mu nueca omashini, ha niikurja ja pama, oshoka itamu ji vuru manka. Nanena itamu ji vuru, oshoka nanena ne opanjama.

³ Nani kamu shi jopanjama, kamu na nani eendjenda dopantu, okasheshe norugodi, sho ji ri mokati keni?

⁴ Nge gumue ta ti: “Ngaje onda gama ku Paulus”, mukuauo: “Ngaje oku Apollo”, nena nduno kamu shi aantu jopanjama? Apollo omutshike? Na Paulus omutshike?

⁵ Ojo aakareri ja ngu mu’iteera, ngashi keshe gumue e tshi peua ku Muene.

⁶ Ongaje nda tsika, Apollo a tekera, ndere Karunga ta kokica.

⁷ Ngu ta tsike ke shi muene, nenge ngu a tekera, aaue, oKarunga ike ngu ta kokica.

⁸ Ngu ta tsike na ngu ta ka tekera, jo oje nokuronga puamue. Ndere keshe ta peua ondjambi he hi cike potshironga tshe.

⁹ Sse aarongi puamue na Karunga. Ne epja rja Karunga etungo rje.

¹⁰ Meenkondo doshenda ha Karunga ndji nda peua, ngaje nda tura po omukanka ng’omutungi onkurungu. Mukuauo ta tungire mu guo. Ndere keshe na tare naua, nokutja ota tungu otshingiini.

¹¹ Kapu na nande gumue ta vuru okutura po omukanka gurue, inagu fa ngu gua turua po nare, okutja oJesus Kristus.

¹² Nge gumue ta tungu momukanka nguka notshingoldi nenge notshisilveri nenge nomamanja goparerera nenge niiti nenge nomuiidi nenge niihenguti,

¹³ shoka otatshi k’oroka motshironga keshe. Esiku rja Muene otari tshi orora, oshoka otatshi k’oroka momuriro. Otshironga tsha keshe gumue otshi ri ngiini, shoka tatshi makerua momuriro.

¹⁴ Otshironga tsha ngu e tshi tungire mo, nge atshi kara po, ota peua ondjambi.

¹⁵ Ndere otshironga tshe nge tsha fikua po, ota mon’iishuna. Ota k’upicua, ndere nga ngu a tokora omuriro.

¹⁶ Kamu tshi nani nokutja ne otempeli ha Karunga, Ombepo ha Karunga nokutja ohi ri mune?

¹⁷ Nge ku na gumue ta nigirike otempeli ha Karunga, ota jonua po ku Karunga, oshoka otempeli ha Karunga ondjapuki, ho oho ne nokuri.

¹⁸ Inamu itshendjereka ne jene. Keshe ngu t’iruku omunandunge muujuni mbuka, na ninge tango omugoua, opo a ninge omunandunge.

¹⁹ Oshoka uunongo u’uujuni mbuka oua f’uugoua motshipara tsha Karunga. Ngashi tsha tshangua: “Onda ara okutompa aanongo nuunkurungu uauo jene.”

²⁰ Itsheue: “Muene oku tshi omadiradiro gaanongo, go kage notshironga.”

²¹ Otsho ano inamu itangera mbjoka ja zi kaantu.

²² Atshishe otsheni. Paulus nenge Apollo nenge Kefas. Uujuni nenge omuenjo nenge eso. Mbjoka je ja na mbjoka aji ke ja. Atshishe otsheni.

²³ Ne oja Kristus. Nde Kristus ogua Karunga.