1 Kaakorinti 2 - Etestemente Epe ✠ 1951

ONTOPORUA 2. Uunkurungu u’uujuni

¹ Otsho nangaje uo, inandi ninga eehapu dopara, do di nuunongo oundji, sho nde ja ku ne, ndi mu uvicire ehokororo rja Kristus.

² Oshoka ond’idiradira kandi mu urukire okutshiua kurue, oJesus Kristus ike, ngu a harerua komutshigakano.

³ Ngija nda ri mokati keni, ngaje nda ri nd’uvite uunkundi netiro nekekamo orindji.

⁴ Meehapu no mehuvico rjandje kamua ri eehapu doku mu eka pamukaro gu’uunongo uaantu, aaue, ombepo neenkondo.

⁵ Uunkurungu uaantu inau ninga omudi guehiteero rjeni, aaue, eenkondo da Karunga.

⁶ Atu rongo tshiri uunongo mokati ka mboka ja guana. Ndere kau shi uunongo u’uujuni mbuka no uaakuruntu juujuni, mba taa shuru po.

⁷ Sse atu rongo uunongo ua Karunga, mbu ua f’otshoorekua, ua orama, Karunga e u uca kehadimo rjetu, ngija uujuni inau tshitua.

⁸ Uunongo mbuka inau dimbururua komarenga guujuni mbuka. Ngeno okua ge u dimburura, ando inaga arera Muene guehadimo komutshigakano.

⁹ Ngashi tsha tshangua: “Kapu na esho rje tshi mona, kapu nokutsi kue tsh’uva, inatshi farua mo momuenjo guomuntu, shoka Karunga a rongera mba je mu ore.”

¹⁰ Ndere Karunga okue tshi tu ororera k’Ombepo he, oshoka Ombepo otahi konakona atshishe nuure u’uukarunga uo.

¹¹ Ore e tshi sho tshi ri momuntu? Ombepo homuntu ndji hi ri mu he, oho ike. Otsho uo kapu na gumue e tshi shoka tshi ri mu Karunga, Ombepo ha Karunga ike.

¹² Ndere sse inatu peua ombepo huujuni, aaue, Ombepo ndji ha zi mu Karunga, opo tu dimburure naua shoka tua peua ku Karunga.

¹³ Shoka otue tshi ronga uo, ha neehapu duunongo uaantu, aaue, oneehapu di tua rongua k’Ombepo Ondjapuki nokufaturura iinima jopambepo komukaro guombepo.

¹⁴ Omuntu guopantshitue ka kuata meendunge de shoka tsha za m’Ombepo ha Karunga. Otsha f’uugoua meendunge de, ita vuru oku tshi tshiua, oshoka otshi nokukonakonua pambepo.

¹⁵ Omuntu guopambepo ota vuru okutshiua atshishe. Nde kapu na gumue te mu uvu.

¹⁶ Ore a dimburura omadiradiro ga Muene, he e mu ronge? Ndere sse otu nomadiradiro ga Kristus.