1 Kaakorinti 16 - Etestemente Epe ✠ 1951

ONTOPORUA 16. Omuapostoli ota kundu ajeshe noku ja kumagida.

¹ Shoka otsha tsa pokugongerera aajapuki iikuaco, ne tamu tshi ningi ngashi ngaje nde tshi uca momagongaro go mu Galatia.

² Mesiku rjotango rjotshivike, keshe gumue na cige tsha pu he sho ta vuru, nokutshi tura motshipunguro, ne kamu shimbike okugongera nge nde ja.

³ Ngaje nge nde ja kune, onda ara okutuma ku Jerusalem mboka mua didirika meembrife deni, kutja oja guana, jo ja fare ko omagano geni.

⁴ Nge otsh’opara okuha ko kuandje, naa he puamue nangaje.

⁵ Onda ara okuja kune nge nda zi ku Makedonia, oshoka onda ara okutokora Makedonia.

⁶ Andi ka menekera shira pune okufu akushe, ne mu ende puamue nangaje hoka te hi.

⁷ Nena inandi ara oku mu tara pokupitirira po ike. Ote diradira ote vuru okukara pune omasiku, Muene nge a hara.

⁸ Onda ara okukara mu Efesus sigo oPentekosten.

⁹ Oshoka ond’egururirua otsheero otshinene tshiironga ojindji. Ndere aanandumbo opo je ri uo ojendji.

¹⁰ Timoteus, nge te ja tareni naua, he a kare pune ke na sho a tira, oshoka oha rongo otshironga tsha Muene nga ngaje.

¹¹ Kaku kare gumue te mu dini, mu kuacereni mombiri nge ta zi ko, he e je kungaje, oshoka sse naamuameme otue mu tega.

¹² Okupopja omukuetu Apollo, ngaje andi mu tshiuicire nokutja nde mu indira unene oku ha ku ne puamue naakuauo. Ina ara okuja ngashingika. Ndere ote ja nge oku necimbo.

¹³ Kotokeni, kareni mua korerera mehiteero, rongeni ng’aarumentuerera neenkondo.

¹⁴ Atshishe shi amu tshi rongo, natshi rongue mohore.

¹⁵ Ondi na nanena ehindiro rimue jamuameme. Omu tshi ondjugo ha Stefanas, ha Fortunatus no ha Akaikus, omu ja tshi ng’aatango jomu Akaia mba j’igandjera arushe ejakuro rjaajapuki.

¹⁶ Nane uo kareni aakuaci ku mboka no ku ajeshe mba haa rongo puamue nasse.

¹⁷ Okuja kua Stefanas, Fortunatus na Akaikus okua njanjudandje, oshoka oje ri pungaje peshara rjeni.

¹⁸ Oja tarareka tshiri omuenjo guandje no gueni. Simanekeni aarumentu ja tja ngaaka.

¹⁹ Omagongaro geklesia rjomu Asia otage mu kundire po, Akuila na Priskilla otaje mu kundu unene mu Muene puamue negongaro rjomondjugo hauo. Ngaje uo omuhenda guauo.

²⁰ Aamuameme ajeshe otaje mu kundu. Kundiracaneni po necipo ejapuki.

²¹ Ekundo rjandje. Paulus. Orja tshangua neke rjandje.

²² Nge ku na gumue ke ore Muene guetu Jesus Kristus, na kondue mo. Maran Ata.

²³ Oshenda ha Muene guetu nahi kare nane.

²⁴ Ohore handje ohi ri puamue nane amushe mu Kristus Jesus Amen.