1 Kaakorinti 12 - Etestemente Epe ✠ 1951

ONTOPORUA 12. Omaganoshendo giiri no giiri

¹ Jamuameme, inandi ara ne mu kare kamu tshi naua enongero rjomagano g’Ombepo.

² Omu tshi tshi tuu ngija mua ri aapagani, ne mua hire kiikarunga jiimboro, inamu diradira tsha.

³ Otsho ano nduno andi mu tshiuicire: Kaku na ngoka ta popi mombepo ha Karunga ta ti: “Jesus na cingue.” Ko kaku na ngoka ta vuru okutja: “Jesus ohe Muene” okuninga ta popi m’Ombepo Ondjapuki.

⁴ Opu nomagano goshenda giiri no giiri. Ndere Ombepo oho tuu himuike.

⁵ Opu nomajakuro giiri no giiri. Ndere Muene ohe tuu gumuike.

⁶ Niironga jeenkondo oji ri ko jiiri no jiiri. Ndere Karunga ohe ngaa ngo ha rongo ajishe mu ajishe.

⁷ Ndere oshempa ngaa ngoka ota peua ehororo rj’Ombepo koruporo rue.

⁸ Gumue ta peua k’Ombepo ohapu huunongo, he mukuauo ta peua ohapu hokutshiua k’Ombepo tuu ndjika.

⁹ Gumue ehiteero m’Ombepo tuu ndjika, mukuauo egano rjokueruda ok’Ombepo tuu ndjika himue.

¹⁰ Gumue okuronga iinjengandunge, he mukuauo egano rjokushunganeka, mukuauo egano rjokujoorora eembepo. Gumue egano rjokupopja omaraka, mukuauo efatururo rjeehapu.

¹¹ Atshishe shoka atshi rongua k’Ombepo ngaa tuu ndjika himue, ndji tahi pe keshe gumue keharo rjaho.

¹² Ngashi orutu oruo rumue nanto ru niikuarutu ojindji, jo iikuarutu nanto ojindji, otaji ningi orutu rumue, otsho tshi ri na Kristus.

¹³ Oshoka metshatsho sse atushe, aajuda naapagani, aapika naavarua, otua ningi tua f’orutu rumue moru’Ombepo himue.

¹⁴ Oshoka orutu karu shi otshikuarutu tshimue, aaue, ojindji.

¹⁵ Ompadi ngeno okua ha tja: “Ngaje kandi na tsha norutu, oshoka kandi shi eke,” ando ho kahi kara nani homorutu?

¹⁶ Nokutsi ngeno okua kua tja: “Ngaje kandi na tsha norutu, oshoka kandi shi esho,” ando kuo kaku kara nani kuomorutu?

¹⁷ Ngeno kua orutu arushe rua ninga esho, nena okuuva okua kara peni? Ngeno kua orutu arushe orua ninga okutsi, nena okudimburura kua kara peni?

¹⁸ Ndere Karunga okua pa iikuarutu, keshe tshimue tsho mu jo eshara rjajo korutu keharo rje.

¹⁹ Ando ajishe otshikuarutu tshimue, nena orutu ando oru ri peni.

²⁰ Opu na ano iikuarutu ojindji, ndere orutu rumue.

²¹ Esho itari vuru okurombuera eke ari ti: “Iironga johe inandi ji pumbua.” Otsho uo nomutse keempadi: “Inandi mu pumbua.”

²² Aaue, Ndere iikuarutu mbi ja fa kaji neenkondo odindji, otue ji pumbua uneenene.

²³ Niikuarutu mbi atu ji tara, kaji nesimano, otatu ji zareke nehoparo, na mbioka tue ji sir’oshoni, otatu ji siikire tshiri.

²⁴ Ndere iikuarutu mbija inatu sir’oshoni, inaji pumbua tsha. Otsho Karunga e tshi uca morutu nokutja iikuarutu mbi aji tarua kaji nesimano mu jo jene, ji simanekue unene.

²⁵ Opo kamu kare morutu ondumbo, aaue, iikuarutu ji siracane otshisho mombiri.

²⁶ Otshikuarutu tshimue nge tatshi ehama, iikuarutu ajishe otaji ehama. Otsho otshikuarutu tshimue nge atshi simanekua, iikuarutu ajishe oja njanjukua na tsho.

²⁷ Ne orutu rua Kristus. Ndere nge mua tarua gumue koogumue, ne iikuarutu.

²⁸ Karunga okua tura po jamue meklesia rje, tango ng’aapostoli, jamue ng’aaprofeti, jarue ng’aarongi jeehapu. Otsho a gandja ku jamue eenkondo dokuronga iijengandunge, dokueruda aavu, okujakura, nokupangera, okupopja omaraka nokufaturura eehapu.

²⁹ Ajeshejeshe jo aapostoli ngaano nee? nenge aaprofeti nenge aarongi jeehapu?

³⁰ Ajeshejeshe oje na tuu eenkondo dokuronga iinjengandunge ngaano nenge egano rjokueruda nenge rjokupopja omaraka nenge okufaturura?

³¹ Kembadareni ne mu peue omagano omanene goshenda, nga ge vure omakuauo. Ndere ngaje nda ara ndi mu urukire nanena ondjira ndji hi vure dija adishe.