1 Kaakorinti 11 - Etestemente Epe ✠ 1951

ONTOPORUA 11. Eemkaro daakriste jotango pokugarikana no pemissa ejapuki

¹ Kareni aahoreri jandje, ngashi ngaje omuhoreri gua Kristus.

² Jamuameme, onda panda unene sho mua dimburukuandje miinima ajishe, ne mua diginina eehapu dandje, ngashi ngaje nde di mu okororera.

³ Onda ara ndi mu tshiuicire naua, nokutja omutse guomurumentu, oKristus, nde omutse guomukiintu omurumentu. Ndere omutse gua Kristus, oKarunga.

⁴ Keshe omurumentu ngu ha garikana, he ha shunganeke nomutse gua siikirua, ota tindire omutse gue esimano rjaguo.

⁵ Nomukiintu keshe ngu ha garikana nenge ha shunganeke nomutse inagu siikirua, ota tindire omutse gue esimano rjaguo, oshoka oku ri a fa a kururua.

⁶ Oshoka omukiintu nge in’isiikira komutse, omafufu ge naga tetue ko. Nge oku na oshoni komukiintu, omafufu nge ga tetua, nge a kururua, nena ano na siikir’omutse gue.

⁷ Omurumentu ka siikira omutse gue, oshoka he otshifeca tsha Karunga nesimano rje. Omukiintu esimano rjomurume.

⁸ Oshoka omurumentu ina za komukiintu, aaue, omukiintu komurumentu.

⁹ Otsho omurumentu ina tshitirua omukiintu, aaue, omukiintu a tshitirua omurumentu.

¹⁰ Otsho omukiintu na kare nedidiriko rjepangero rje komutse gue moru’aajengeli.

¹¹ Ndere motshipara tsha Muene, omukiintu ke vure omurumentu, nomurumentu ke vure omukiintu.

¹² Oshoka ngashi omukiintu a zi komurumentu, otsho omurumentu e ri po moru’omukiintu, ndere atshishe otsha zi ku Karunga.

¹³ Popjeni ne jene, otsh’uka tuu, omukiintu nge ta garikana Karunga, ina siikira omutse?

¹⁴ Nenge inamu tshi dimburura meendunge deni nokutja omafufu omare gomurumentu otage mu gugica?

¹⁵ Ndere omukiintu nge oku nomafufu omare otage mu opeke. Oshoka omafufu omare okue ga peua ng’otshisiikiro.

¹⁶ Nge oku na gumue e tshi oku nokupatana, na tshiue, nokutja sse katu nomukaro ngu, guo kagu ri meklesia rja Karunga.

¹⁷ Ngaje otsho nda ara ngii. Tsho otsho kandi neehapu dokuamberera iigongi jeni, oshoka itaji mu kuacere kuuhanaua, aaue, okuuhineji.

¹⁸ Okushimbika niinima mbi: ngaje ond’uvu nokutja iimpaga taji oroka mokati keni, nge tamu gongara. Onde tshi iteera katshona.

¹⁹ Tshiri eehapu depukico odi nokupopiua, aadiginini jomehiteero j’ororue.

²⁰ Okugongara kueni kaku shi ue okuuharera uurarera ua Muene.

²¹ Oshoka keshe ota kuca tango uurarero ue nde ta ri. Otsho gumue a sondjara, he mukuauo a korua.

²² Kamu na nani eendjugo mu amu rire na mu amu nuine? Nenge amu dini ano egongaro rja Karunga, nde amu gugica mbo kaa na tsha? Nandi mu rombuere tshike? Nandi mu amberere? Aaue, motshinima shika itandi vuru ku mu amberera.

²³ Oshoka onde tshi rombuerua ku Muene, sho nde mu okororera, nokutja uusiku mbuija Muene Jesus a gouekua, okua kuca ombroto.

²⁴ Ta amberere e hi pambura nde ta ti: “Tuumbeni rjeni, shika orutu ruandje aru gandjua morueni. Tshi ningeni nekudimburukuandje.”

²⁵ Otsho uo ngii a kuca otshooro, uurarero sho ua pu, nde ta ti: “Otshooro shika eguaneno epe mombinzi handje. Uuna amu tshi nu tshi ningeni nokudimburukuandje.”

²⁶ Oshoka uuna amu ri ombroto ndjika ne amu nu otshooro shika, namu epurure eso rja Muene sigo ote ja.

²⁷ Ano keshe ngu ta ri ombroto ndjika, nenge ta nu otshooro tsha Muene, he in’opara, ohe e nondjo korutu no kombinzi ha Muene.

²⁸ Omuntu n’ipurapure ano, he na rje ngaa nduno ombroto ndjika, he na nue motshooro shi.

²⁹ Oshoka ngono ta ri he ta nu in’opara, ohe t’irire he t’inuine epanguro, oshoka ina joorora orutu rua Muene.

³⁰ Omorua shi ne mu na mokati keni aankundi ojendji naavu. Ojendji oja koca po.

³¹ Ando sse tu’ikonakona sse jene, andora inatu pangurua.

³² Ndere nge atu pangurua, otatu geerua ku Muene, katu shundurue puamue nuujuni mbu.

³³ Ano, jamuameme, nge tamu gongara mu rje, tegereracaneni.

³⁴ Nge oku na gumue a sondjara, na rje maandjauo, kamu gongare epanguro. Iinima iikuauo andi k’uca nge nde ja.