1 Kaakorinti 10 - Etestemente Epe ✠ 1951

ONTOPORUA 10. Oshenda ha Karunga nehupico rjaantu

¹ Inandi ara, jamuameme, ne kamu tshi tshiue naua, nokutja ookuku ajeshe ja ri motshikogo, nde ajeshe oja tokora efuta.

² Ajeshe oja tshatsherua mu Moses motshikogo no mefuta.

³ Ajeshe ja rja uo otshikurja tshimue tshomuenjo.

⁴ Ajeshe ja nua uo okunua kumue kuomuenjo, oshoka oja nu kemanja enene rjokomuenjo, ndi rje ja randura. Rjo emanja ndi enene, Kristus.

⁵ Ndere ojendji jo mu jo, Karunga ine ja panda. Oja jonua po mombuga.

⁶ Shoka tsha ningua kekumagido rjetu, katu aruke uuhineji ngashi mbejaka j’arukire.

⁷ Otsho ano nduno inamu simaneka iimenka, ngashi jamue jo mu jo. Otsho kua tshangua: Aantu ja kaatumba, taa ri jo taa nu, taa cikama okudana.

⁸ Inatu ara tu ondere ngashi jamue jo mu jo j’ondera, jo ja dipagua, omajovi eemrongo mbari na gatatu esiku rimue.

⁹ Inatu shinda Kristus ngashika jamue jo mu jo je mu shinda no ja rika po komajoka.

¹⁰ Inamu ngungutura ngashi jamue jo mu jo ja ngungutura nde ja jonua po komujengeli guondjashi ha Karunga.

¹¹ Oja ningirua iinima mbika kedidiriko. Oshoka tsha tshangua kekumagido rjetu, sse sho tu ri momacimbo ga shugunina.

¹² Otsho ano ngoka e tshi a cikama, na kotoke, he k’ishate po.

¹³ Inamu adika kemakero ndi ri vure eenkondo dopaantu. Karunga omudiginini. Ite mu ecere omamakero nga ge vure eenkondo deni, aaue, mumue nemakero ota gandja uo ompito hoku ri sinda ne mu ididimike.

¹⁴ Otsho te tire, jahorike jandje, angareni esimaneko rjiimenka.

¹⁵ Andi popi kune ng’aanandunge. Ne jene pangureni doka andi popi.

¹⁶ Otshooro tshejambeko, shi atu jambeke, katshi shi nani eguaneno nombinzi ha Kristus? Nombroto ndji atu pambura kahi shi ngaa nani eguaneno norutu rua Muene?

¹⁷ Sho pu na ombroto himue, sse ojendji orutu rumue, ss’atushe sho tu na otshitoporua tshetu mombroto ndjika himue.

¹⁸ Tareni uo aaisraeli panjama. Kaje na nani otshitoporua tshauo mohaltari ajeshe mba haa ri koshura?

¹⁹ Ne tje tshike ano? Omagano ga saagererua iimenka oge notshironga? Nenge otshimenka otshi noruporo? Aaue.

²⁰ Omagano gaapagani taga gandjua kaasatana, kaga gandjua ku Karunga. Ndere ngaje inandi ara ue mu kare meguaneno rjaasatana. Itamu vuru okunua otshooro tsha Muene notshooro tshomusatana mumue.

²¹ Itamu vuru okurja kotshiriro tsha Muene no kotshiriro tshomusatana.

²² Nenge otua ara tu shinde Muene? Sse otu vure Muene meenkondo? Onda pitikirua atshishe, ndere tsho inatsh’opara atshishe.

²³ Atshishe onda pitikirua, ndere atshishe shoka katshi koreka uo muuhanaua.

²⁴ Inamu konga oruporo rueni ruoruene, aaue, onduka ruamukueni.

²⁵ Rjeni atshishe atshi randicua pomarandero gonjama, inamu ipurapura moru’ehuvo rjomutima.

²⁶ Oshoka evi orja Muene, na atshishe shoka tshi ri mo.

²⁷ Ano nduno nge amu shiua ku mboka kaa nehiteero, ne mua ara mu he ko, rjeni atshishe shi amu turirua po, inamu ipurapura moru’ehuvo rjomutima.

²⁸ Ndere nge oku na ngoka ta ti: “Onjama hoshura ondji,” inamu rja morua ngu e tshi mu okororera no moru’ehuvo rjomutima.

²⁹ Ite popi ehuvo rjohe rjomutima, aaue, ondi rja nguijaka, oshoka ehipangero rjandje otshike nari peue uusama kehuvo rjomutima rja mukuetu.

³⁰ Nge andi ri tsha nokupandura Karunga, otshike nduno nandi peue uusama morua shoka nda pandura?

³¹ Nge amu ri nenge amu nu nenge amu rongo tsha, atshishe tshi ningue kesimaneko rja Karunga.

³² Inamu kuajurica aajuda, nenge aapagani, nenge eklesia rja Karunga.

³³ Otsho nangaje uo nda kembadara okuoparera ajeshe, kandi konga shoka tshandje, aaue, otsho shi tsh’oparera ojendji, jo j’upicue.