1 Kaakorinti 1 - Etestemente Epe ✠ 1951

ONTOPORUA 1. Uunkurungu uomevangelium

¹ Paulus, keharo rja Karunga omuapostoli omuhicanua gua Jesus Kristus, na Sostenes omumuameme.

² Kegongaro rja Karunga mu Korint. Ku mboka ja japurua mu Kristus Jesus, j’icanua muujapuki, no ku ajeshe mba taa garikana medina rja Muene guetu Jesus Kristus, mba je ri huija nenge hu.

³ Oshenda nombiri ha Karunga Tate hetu, ho ha Muene guetu Jesus Kristus nahi kare puamue nane.

⁴ Andi mu ambererere Karunga kandje arushe moru’oshenda ha Karunga, ndjoka mua peua mu Kristus Jesus.

⁵ Mu he ne mua ningi aajamberera miinima ajishe, momarongo ageshe no mokutshiua akushe.

⁶ Ngashi ehokororo rjokuokorora Kristus rja korekua mune.

⁷ Otsho inamu pumbua omaganoshenda metegerero rjeni rjokutegerera ehoroko rja Muene guetu Jesus Kristus.

⁸ Ngu te ke mu koreka sigo okeshuriro, ne mu kare kamu nuurunde mesiku rjejo rja Muene guetu Jesus Kristus.

⁹ Karunga omudiginini. He e mu icana meguaneno rj’Omona gue, Muene guetu Jesus Kristus.

¹⁰ Jamuameme, ngaje andi mu indire medina rja Muene guetu Jesus Kristus, kareni arushe neraka rimue, inamu kara mu niimpaga mokati keni, aaue, kareni mondjira himue homeendunge no momadiradiro geni.

¹¹ Oshoka, jamuameme, ond’okororerua ku jaandja Kloe, nokutja opu neentamanana mokati keni.

¹² Ondi tshi sho tatshi tiua mokati keni, nokutja gumue ota ti: “Ngaje onda gama ku Paulus.” He mukuauo: “Ngaje oku Apollo.” Mukuauo itshee: “Ngaje oku Kefas.” Mukuauo itshee: “Ngaje oku Kristus.”

¹³ Kristus okua toporua nee? Nenge Paulus okue mu arererua komutshigakano? Nenge ne mua tshatsherua medina rja Paulus?

¹⁴ Onda pandura Karunga, shoka inandi tshatsha nande ogumue guomokati keni, oKrispus na Gajus ike.

¹⁵ Ne otsho itamu vuru okutja omua tshatsherua medina rjandje.

¹⁶ Ndere, eno, onda tshatsha uo efamilia rja Stefanus. Kandi tshi ue gurue a tshatshua kungaje.

¹⁷ Inandi tumua ku Kristus okutshatsha, aaue, okuuvica evangelium ha muunkurungu ueehapu dopara, omutshigakano gua Kristus kagu kanice eenkondo daguo.

¹⁸ Oshoka ohapu homutshigakano oho uurai mu ajeshe mba taa kana. Ndere eenkondo da Karunga musse mba tatu upicua.

¹⁹ Momatshangua aku tiua: “Otandi shanagura po uunkurungu u’eenkurungu. Ote dimi po eendunge daanandunge.”

²⁰ Omunandunge, omunogoramata, omukonakoni gu’uujuni oku ri peni? Karunga ina rundurura uunongo u’uujuni mbuka, e u ningi uurai?

²¹ Oshoka uujuni muunongo uauo, sho inau dimburura Karunga muunongo ue ua Karunga, nena otsh’oparera Karunga okuupica nehuvico egoua ajeshe mba j’iteera.

²² Ajuda oja ara omadidiriko, aapagani haa kongo uunkurungu.

²³ Ndere sse at’uvica Kristus h’omuarerua komutshigakano, erudiko kaajuda, uurai kaapagani.

²⁴ Ndere mboka j’icanua maajuda no maapagani, atu j’uvicire Kristus, ng’eenkondo da Karunga, ng’uunongo ua Karunga.

²⁵ Shoka tsha f’uurai mu Karunga, otshi vure uunkurungu uaantu. Shoka tsha f’uunkundi mu Karunga, otshi vure eenkondo daantu.

²⁶ Tareni ehogororo rjeni, jamuameme. Aankurungu ojendji jokeendunge daantu kamu na, nenge aanankondo, nenge aanamadina, aaue.

²⁷ Shoka tsha f’uurai motshipara tshuujuni, otsh’ogororua ku Karunga, he a gugice aanandunge. Shoka tsha f’uunkundi muujuni mbuka, Karunga e tsh’ogorora, he a gugice aanankondo,

²⁸ Shoka otshishupi, otsho tsha dinika, sho katshi notshironga, Karunga e tshi ogorora, he a tompore shoka tshi nedina.

²⁹ Otsho nand’ogumue n’itangere he muene motshipara tsha Karunga.

³⁰ Omorue mu ri mu Jesus Kristus, ngu a ningi keharo rja Karunga uunongo, uujapuki, ejapuro nekuriro rjetu.

³¹ Opo keshe ngu a hara kuitangera, a hitangere mu Muene ngashi tsha tshangua.