1 Johannes 5 - Etestemente Epe ✠ 1951

ONTOPORUA 5. Kareni mehiteero no mohore.

¹ Keshe ngoka a hiteera Jesus nokutja oKristus, h’okua varua mu Karunga, na keshe ngu e hore ngoka e mu vara, he e hore uo omuvarua mu he.

² Ohore hetu hokuora aana ja Karunga otatu hi dimburura mohore hetu hokuora Karunga no mokuguanica iipango je.

³ Ohore hokuora Karunga oho ndjoka, okuguanica iipango je. Iipango mbi kaji shi iidigu.

⁴ Atshishe shoka tsha varua mu Karunga, otatshi sindi uujuni. Esindano rjetu, ndi ari sindi uujuni, orjo ehiteero rjetu.

⁵ Ore ta sindi uujuni? Ke shi ngaa ngoka a hiteera Jesus nokutja Omumua Karunga?

⁶ Ohe tuu nguka e ja momeja no mombinzi, Jesus Kristus, ha momeja ike, aaue, omomeja no mombinzi. Ombepo otahi okorora uo nokutja Kristus ohe otshiri.

⁷ Oku na jatatu haa hokorora meguru: She n’Ohapu n’Ombepo Ondjapuki. Mboka jatatu ojo gumuike.

⁸ Oku na jatatu haa hokorora pevi ndika: Ombepo nomeja nombinzi. Mbika iitatu ojo tshimuike.

⁹ Nge tu’iteera ehokororo rjaantu, nena ehokororo rja Karunga ori vure ndiaka. Ehokororo rja Karunga ndi ri vure ndiaka orjo ndika sho a hokorora Omona.

¹⁰ Keshe ngu a hiteera Omumua Karunga, ehokororo, rja Karunga ori ri mu he. Ngu in’iteera Omona, ote mu ruku omuniirombo, oshoka in’iteera ehokororo, ndi Karunga a hokorora Omona.

¹¹ Ehokororo orjo ndika: Karunga okue tu pa omuenjo guarushe, guo omuenjo nguka ogu ri m’Omona.

¹² Keshe ngu e n’Omona, oku nomuenjo ngu. Na keshe ngu ke na Omona, ke na omuenjo ngu.

¹³ Shoka andi tshi mu tshangere, opo mu tshiue nokutja mu nomuenjo guarushe, oshoka omu’iteera edina rj’Omumua Karunga.

¹⁴ Rjo ehinekero rjetu rjoku mu inekera orjo ndika ote tu uvu miinima ajishe mbi atu indire keharo rje.

¹⁵ Sho tua tshiua nokutja ote tu uvu nge tatu mu indire tsha, nena sse tu tshi uo, kutja atu ka peua shoka tue mu indira.

¹⁶ Ngu e tshi mumuahina a ning’ondjo, ndji itahi fara meso, ne mu garikanene. Na ngoka ina ninga ondjo ndji ahi fara meso, ota peua omuenjo. Oku nondjo ndji ahi fara meso. Pu ndjoka itandi mu rombuere mu garikane.

¹⁷ Uumbudi aushe ouo ondjo. Nde opu nondjo ndji ahi fara meso.

¹⁸ Otu tshi tshi keshe ngoka a varua mu Karunga, ka jona. Okuvarua kue mu Karunga otaku mu kerere, nomuhineji ite mu njenge.

¹⁹ Sse otu tshi nokutja otua zi mu Karunga, nuujuni aushe au kara muuhineji.

²⁰ Otsho otu tshi tshi, Omumua Karunga okue ja nokue tu pa eendunge dokudimburura Karunga kotshiri, tu kare tua guanekua n’Omona gue guotshiri. Ngoka Karunga kotshiri, h’omuenjo guarushe.

²¹ Janona, angareni iimenka. Amen.